Ус дахин боловсруулах үйлдвэрийн шавыг Сонгинохайрхан дүүргийн 20 дугаар хороонд шинээр баригдаж буй төв цэнгэлдэх байгууламжийн баруун талд тавьлаа. Ингэснээр уг үйлдвэрийн төслийн ажил өнөөдөр эхэлж байна. Энэ үеэр ус дахин боловсруулах үйлдвэрийн төсөлд хамтран ажиллаж буй болон төсөл хариуцсан хүмүүсийн яриаг хүргэж байна.
Камерон Алфорд: Энэ төслийг усны төсөл гэж нэрлээд байгаа боловч мөн чанар нь хүмүүст чиглэсэн төсөл юм
АНУ-ын МСК-ын Компакт гэрээний үйл ажиллагааны газрын Дэд Ерөнхийлөгчийн үүрэг гүйцэтгэгч Камерон Алфорд ус дахин боловсруулах үйлдвэрийн талаар яриа өглөө. Тэрбээр "Юун түрүүнд энд хүрэлцэн ирсэнд баяртай байна. Ус боловсруулах үйлдвэрийг байгуулснаар Монгол Улсын цэвэр усны хэрэглээг хэмнэх боломжийг олгох ач холбогдолтой. Мянганы сорилтын сангийн хоёр дахь төсөл буюу усны төсөл хоёр дахь жилийн нүүрийг үзэх гэж байна. Энэ төсөл дахиад гурван жил үргэлжилнэ. Бидний хувьд энэ гол төслөө бүрэн гүйцэт, хугацаанд нь гүйцэтгэхээр ажиллаж байна. Улаанбаатар хот усны нөөц хомсдож, ирээдүйд хүнд нөхцөлд орохоор байгаа. Энэ бол тулгамдсан асуудлын нэг мөн. Нийслэл хотын зүгээс олон төрлийн уур амьсгалын асуудлууд бий. Хязгаарлагдмал цэвэр усны эх үүсвэрийг хэмнэх зорилготойгоор энэ ус дахин боловсруулах үйлдвэр байгуулж буй. Энэ нь хэмнэж, хэрэглэх боломжийг үүсгэж байгаа юм. Энэ төслийг усны төсөл гэж нэрлээд байгаа боловч мөн чанар нь хүмүүст чиглэсэн төсөл юм. Усны төслийн хэрэгжүүлснээр уур амьсгалын өөрчлөлттэй тэмцэхэд тодорхой хэмжээнд хувь нэмэр оруулна” гэлээ.
Б.Даваа-Очир: Уг үйлдвэрийг 2025 онд бүрэн ашиглалтад оруулна
"М-Си-Эс Проперти" ХХК-ны гүйцтэгэх захирал Б.Даваа-Очир "Мянганы сорилтын сангийн хаягдал ус дахин боловсруулж, үйлдвэрлэлийн технологийн шаардлага нийлүүлэх төсөлд Монголын үндэсний компани "М-Си-Эс Проперти" ХХК шалгарсан. Үндэсний компани гэдгээрээ онцлог юм. Бид энэ технологийн тэргүүлдэг Францын хоёр компанитай хамтран ажиллаж байгаа. Энэ утгаараа дэлхийн шилдэг технологиуд энэ үйлдвэр дээр орж ирнэ. Бүрэн ашиглалтад оруулах хугацаа нь 2025 он. Харин 2024 онд зүгшрүүлэлтийн ажил хийгдэнэ. Зураг төслийн ажил гарчихсан явж байна" гэв.
Т.Хишигт: Усыг таван шатны дамжлагаар цэвэрлээд хоёр станцын технологийн хэрэгцээнд ус дамжуулах шугам хоолойгоор дамжуулна
Хаягдал ус дахин боловсруулах төслийн захирал Т.Хишигт "Ус дахин боловсруулах үйлдвэр ашиглалтад орсноор Улаанбаатар хотын ариутгах сүлжээгээр ирж цэвэрлэгдээд байгаль руу нийлүүлдэг байсан энэ уснаас ихээхэн хэмжээний усыг дахин боловсруулж, эргүүлэн ашиглана. Тэр тусмаа дулааны цахилгаан станцуудын техникийн усны зарим усыг хангах боломж бүрдэнэ. Үйлдвэрийн суурилагдсан хүчин чадал хоногт 50 м3 усыг дахин боловсруулах чадалтай байна. Цаашид дахин боловсруулсан усыг иргэд хэрэглэж эхэлбэл үйлдвэрээ өргөтгөх зай талбайг үлдээж байгаа. Дулааны цахилгаан станцууд дээр хүргэлтийн усны системд ажиллана. Үнсийг усаар зайлуулах системд ашиглана. Мөн станц дотор хийгддэг угаалга цэвэрлэгээ болон галын усны системд ашиглагдана. Энэ төслийн хүрээнд хоёр станцын техникийн усны системийг өөрчилж байгаа юм. Тухайлбал, аль нэг системд ямар нэг асуудал гарвал станцууд найдвартай байдлаа хангах үүднээс гүний ус руу шилжиж ажиллах боломжтой хийгдэж байна. Энэ ус MNS67342018 гэсэн стандартаар дахин ашиглах цэвэрлэсэн ус гэсэн нэр томьёотой байдаг. Тухайн усыг таван шатны дамжлагаар цэвэрлээд хоёр станцын технологийн хэрэгцээнд ус дамжуулах шугам хоолойгоор дамжуулаад өгнө" гэв.
Д.Батчулуун
