Мэргэжлийн болон техникийн боловсрол, сургалтын салбарын нэр хүндийг дээшлүүлэх, суралцагчдын ур чадварыг ахиулах, мэргэшүүлэх, тэдний түвшинг олон улсын жишигт хүргэх нь энэ тэмцээний зорилго юм. Мөн 2024 онд БНФУ-н Леон хотод болох “Дэлхийн ур чадвар”-ын 47 дахь тэмцээнд оролцох үндэсний ялагчийг “Монгол ур чадвар 2023” тэмцээнээс шалгаруулна.
Монгол ур чадварын тэмцээний эхний шат тавдугаар сарын 29-31-ний өдрүүдэд Мужаан, Өрөг угсрагч, Сантехникч, Тогооч, Цахилгаанчин, Гагнуур, CNC Токарь, График дизайн мэргэжлүүдээр зохион байгуулагдлаа.
Тус тэмцээнийг БШУЯ, “Мэргэжлийн боловсрол, сургалт түншлэл” ТББ, GIZ-“Түншлэлд суурилсан техникийн болон мэргэжлийн боловсрол, сургалт” төсөл хамтран зохион байгууллаа. Мөн холбогдох мургуулиуд, мэргэжлийн холбоод, төрийн бус байгууллагууд хамтран оролцож байна.
Монгол ур чадвар 2023 тэмцээний нэгдүгээр шатанд 138 суралцагч, 103 багш өрсөлдсөн. Тэднээс дараагийн шатанд 17 МБСБ-ын 41 суралцагчид шалгарлаа. Тэмцээн нийт 3 шаттайгаар зохион байгуулагдана. Хоёрдугаар шат 2023 оны аравдугаар сарын 12-13-нд, гуравдугаар шат арванхоёрдугаар сард болно.
Өмнөговь аймаг дахь Политехник Коллежоос хамгийн олон оролцогч буюу 7 суралцагч, Барилгын Политехник Коллеж 5, Баянхонгор аймаг дахь Политехник Коллеж 5, Техник Технологийн Политехник Коллежийн дөрвөн оролцогч хоёрдугаар шатад шалгарсан байна.
