Ирэх долдугаар сарын 1-нээс тэтгэвэр нэмэгдэх ч Нийгмийн даатгалын сангаас тэтгэвэр авдаг 161 мянган хүний тэтгэвэр нэмэгдэхгүй. 

Учир нь тэтгэвэр нь нэмэгдэхгүй 161 мянган иргэний цалингийн мэдээлэл архиваас олдохгүй байгаа юм. Зах зээлийн харилцаанд шилжсэн эхний жилүүдэд байгууллагууд ажилчдынхаа материалыг үрэгдүүлсэн тохиолдол их байгаа аж.

Энэ талаар НДЕГ-ын даргын үүргийг түр орлон гүйцэтгэгч Ц.Ганцэцэг “85 мянга орчим хүний хувьд 1995 оноос өмнө буюу нийгмийн даатгалын харилцаа үүсээгүй үед тэтгэврээ тогтоолгосон байна. Энэ хүмүүст хөдөлмөрийн дэвтэр, архивын лавлагаа, тушаал, шийдвэрийн хуулбар, шүүхийн шийдвэр гээд үндсэн баримтуудаа бүрдүүлэхэд ажилласан жил нь нотлогддог. Нийгмийн даатгалын сангаас олгох тэтгэвэр, тэтгэмжийн тухай хуульд зааснаар шимтгэл төлж ажилласан жил шаардлага хангасан нөхцөл болж байгаа. Энэ шаардлагыг хангасан хүмүүсийн санхүүгийн баримт нь олдохгүйгээс болоод цалин хөлсгүй тэтгэврээ тогтоолгочихсон. Энэ хүмүүсийн хувьд итгэлцүүр хэрэглэх боломжгүй, цалингүй учраас инфляцын түвшингээр тэтгэвэр 10 хувиар нэмэгдэх ийм нөхцөл байдал үүссэн” хэмээн мэдээлжээ.