Монгол бөхийн удмыг удаан хугацаанд таслахгүй авч яваа гэр бүл гэвэл дархан аварга Г.Өсөхбаярынхан байна. Даян аварга өвөө Н.Жамъян нь Ардын хувьсгалаас хойш төрөн гарсан гурав дахь аварга цолтон бол хүү Пэрэнлэйжамц нь удахгүй болох жүдо бөхийн “Улаанбаатар-2023” их дуулгад барилдана гэнэ. Үндэсний бөхөөр ч муугүй гэдгээ харуулсан. “Өндөр аварга”-ын төрсөн дүү Г.Батбаяр нь улсын харцага цолтой. Ийм нэгэн бөхийн их айл бидэнтэй нэгэн цаг дор амьдарч буй.  

Аварга Г.Өсөхбаяр наадмаас өөр барилдаанд зодоглохоо больсон. Зүүний магнайг өөр нэгэнд алдахгүй авч яваа тэрбээр “Алдар” спорт хорооны даргаар нэлээд олон жил ажиллаж байна. Өдгөө 50 настай тэрбээр Улсын наадмын гурвын даваанд дархан эрхээ эдлэн нутгийн дүү нараа тунаанаас гаргахтайгаа л байна. 

Харин төрсөн дүү Г.Батбаяр нь Баянгол дүүргийн Биеийн тамир, спортын хорооны нэгдүгээр хүн. Бас төрд зүтгэж яваа бөх. Өнгөрсөн наадмаар барилдахдаа ялихгүй асуудал үүсгэснээс бусдаар өөлөх юмгүй. Тэдний зулайг гишгэж төрсөн эгч Г.Наранчулуун нь ХХААХҮЯ-ны Мал аж ахуйн бодлогын хэрэгжилтийг зохицуулах газрын даргын алба хашдаг гэнэ. Аварга Г.Өсөхбаярын гэргий Б.Нарантуяа бас дарга.

ЭМҮХТ-ийн даргаар ажиллаад удаж байна. Мундаг, үлгэр жишээ гэр бүл байгаа биз. Бөхийн удмыг залгуулна, дарга ч болно. “Бөхийн удмыг залгуулагчид” дарга байж болохгүй гэсэн хууль байхгүй. Хайсан ч олдохгүй. “Бөх бол төр” хэмээн нэгэн нэртэй бөх хэлсэн нь юутай үнэн. Бөх бол төр юм гэхэд бөхийн удам яагаад төр барьж болохгүй гэж.

А.Сүх