Шөнийн 1 цаг 30 минут. 22 зорчигчийн зарим нь урт өдрийн төгсгөлд амсхийх шиг цонх налан унтаж, зарим нь гадагш ширтэн бодлогоширч, нэг хэсэг нь юу ч юм ярин инээлдэнэ.
Хотын төвөөс баруун зах руу давхиж буй эл нийтийн тээврийн жолоочийн ажил “Таван шар”-аас буцаж эргээд, 2 цаг 08 минутад эцсийн зогсоол болох Боловсролын их сургууль дээр ирснээр дуусах ёстой гэв.
Автобусны жолооны дор хяналтын камерийн дүрс бичлэг гарна. Энд нэгнээсээ эмээх шаардлагагүй бололтой. Дараагийн зогсоол 10 дугаар хороолол. Хүмүүс ядарсан харагдана. Нүдээ нухалж, зүйрмэглэнэ, цочиж сэрнэ. Амьдралд алжааж сульдсан зүрхээ амраах шиг мөр, мөрөө түшнэ.
Тухайн шөнийн тээврээр үйлчлүүлж байсан иргэд “Оройтсон үедээ унааны мөнгөгүй бол алхдаг, мөнгөтэй үедээ такси барьдаг байсан. Одоо тэгэх шаардлагагүй боллоо” гэж байв.
Оройн 22:00 цагаас 2:00 цаг хүртэл нийтдээ таван удаа, 30 минутын зайтай тойрох ёстой ч 22 цагийн үед замын түгжрэл төдий л сийрэгжээгүй байсан тул дөрөв тойрч амжсан талаар автобусны жолооч ярьж байлаа.
Их хотын дүр зураг автобусны цонхонд өөр, өөрөөр ойж харагдана. Тортой хүнс, чихэвч, бэлэг гээд бүгд л амьдралынхаа нэг хэсгийг атгаж сууна. Саппорогийн зогсоол дээр хаалга нээгдэв.
Тэнд хэд хэдэн хүнийг 2000-3000 төгрөгөөр зорьсон газар нь хүргэдэг таксины жолоочид байх агаад “1000 төгрөгөөр тэр зүгт явна” гэж дэргэдүүр өнгөрсөн хүмүүст хэлнэ.
Хоёр удаа зорчих мөнгөөр, ялангуяа суудалтай, хүнгүй шахуу автобусыг хэн л алдах билээ. Сууж явсан автобус нэг тойроод ирэхэд бидний замд такси барихаар гараа өргөж буй тааралдсангүй.
Нийслэлийн тээврийн газрын тээвэр төлөвлөлтийн хэлтсийн дарга Б.Тамир хэлэхдээ, “Зорчигчдын тоо нэмэгдэж байна. Бид оюутан сурагчдын хичээл сургууль эхэлтэл буюу есдүгээр сарын 15-ны өдрийг хүртэл шөнийн тээврийн үйлчилгээг явуулна. Улаанбаатар хотынхоо агаарын болон орчны бохирдол, орчны дуу чимээг багасгах үүднээс цахилгаан автобусыг сонгосон. Цаашдаа илүү олон чиглэлд явуулах зорилт тавин ажиллаж байна” гэж байлаа. Мөн “ШҮ” гэж хайлт хийснээр өөрийн явах чиглэлийн автобус ирж байгаа эсхүл зарим чиглэлд шөнийн автобус явах эсэхийг мэдэх боломжтой юм. Улаанбаатар хотын иргэдийн эрэлт хэрэгцээнд тулгуурласан, судалгаанд суурилж эхлүүлсэн үйлчилгээ зорчигчдын сэтгэлд нийцжээ. Өмнөх жилүүдэд шөнийн автобус явдаг байсан ч ийм оройн цагаар явж байгаагүй юм билээ.
Шөнийн 2 цаг 10 минут. Буудал зарлагч төхөөрөмжөөр “Хөдөлгөөн зогслоо” гэж сануулав. Энэ оройн сүүлчийн автобус эцсийн зогсоолдоо ирлээ. Хүмүүс ч бууж, нэг өдрөө ардаа үлдээн гэр гэрийн зүг одов. Таван шарын замын урсгалыг бодвол хотын төв нам гүм байлаа.
Гэвч бидний Нийслэлийн хаа нэгтээ хүний хүү амьдралын төлөө зүтгэсээр “Шөнийн сүүлчийн автобус”-наасаа хоцорсон л байгаа. Амьдрал гэдэг ийм.
Есдүгээр сарын 15-ныг хүртэл чиглэлээ нэмэн автобусаа явуулж, иргэддээ тэгш хүртээмжтэй үйлчилгээг үзүүлэхээр зорилт тавьж буй нь сайшаалтай. Харин жолооч ч гэсэн хүн тул ажлын хуваарийг нь зөв зохион байгуулахгүй бол "Эхэлж байгаа болохоор ингэж байгаа байх, өдөр гараад шөнө ахиад гарах юм" гэж нэгэн жолооч үгээ дайсан билээ.
Нийтийн тээврийн дараах зургаан чиглэлд шөнийн автобус явж байна. Үүнд,
• ШҮ:1 “5 шар-Сүхбаатарын талбай”
• ШҮ:2 “Сүхбаатарын талбай-Ботаникийн эцэс”
• ШҮ:3 “Шархад-3, 4-р хороолол”
• ШҮ:4 “3, 4-р хороолол-Өнөр хороолол-ХМК”
• ШҮ:5 “Зунжин худалдааны төв-Ард кино театр”
• ШҮ:6 “МУБИС-Архивын ерөнхий газар” гэсэн чиглэлд үйлчилнэ.
М.Дэвээжаргал
