Үүсээд буй нөхцөл байдлын талаар Гандантэгчилэн хийдийн хамт олон мэдээлэл хийлээ. Энэ үеэр Гандан телевизийн захирал Ж.Одгарьд дараах мэдээллийг өглөө.

Тэрбээр "Тухайн хэрэг гарсан байж болзошгүй нөхцөл байдлыг хууль хяналтын байгууллага, олон нийтийн байгууллага нийлээд хянан шалгаж байгаа. Шүүхээр гэм буруутай нь тогтоогдоогүй нэгнийг гэм буруутан болгож болохгүй. Гандандэгчэнлэн хийдэд 2023 оны зургаадугаар сарын орой нэгүн.мн гэх хэвлэл мэдээллийн сайт энэ талаар мэдээлсэн.

Тэр даруй нь бид цуглан хуралдсан. Цуглаад цагдаагийн байгууллага, хууль хяналтын байгууллагад хүсэлтээ гаргаад хэрэг хянан шалгах ажиллагааг эхлүүлсэн. Ийнхүү хэрэг хянан шалгаж буй хугацаанд тодорхой мэдээлэл өгч болохгүй гэж хуульд заасан байдаг. Тиймээс нөхцөл байдлын талаар тодорхой мэдээлэл өгөх боломжгүй байна.

Хэвлэл мэдээллийн хэрэгсэл, цахим орчноор шүүн ялладаг байдал хэрээс хэтэрч байна. Гандантэгчэлэн хийд бол соёлын өвийн онцгой бүс. Олон зуун жил оршиж ирсэн оюуны үнэт өв. Үүнд зүй бусаар халдах, лам хуврагуудыг харлуулж худал мэдээлэл тарааж байгаа нь зохисгүй үйлдэл. Нэр бүхий улс төрчид ч энэ талаар ярьж байгаа нь зохисгүй.

Нийгэмд үүссэн нөхцөл байдалд цочирдож байна. Энэ асуудлыг ярихад ч эвгүй. Лам хуврагууд, хийдийг олон нийтээрээ гутаасанд харамсаж байна.

Үнэн зөвийг хуулийн байгууллага шийдэх болно. Шүүхээр буруутай нь тогтоогдоогүй байхад нэрийг зарлаж байгаад харамсаж байна. Бид хүүхдийн эрхийн төлөө ажиллана" гэв. 

Д.Батчулуун