"Дэлхийн жижиг дунд үйлдвэрлэлийн өдөр-2023" үзэсгэлэн худалдаа энэ сарын 26-28-ны өдрүүдэд Сүхбаатарын талбайд болно. Өнөөдрийн арга хэмжээ арьс ширэн бүтээгдэхүүн үйлдвэрлэгчдийн танилцуулгаар эхэлж байна. Арга хэмжээг нээж, "Монголын арьс ширний үйлдвэрлэлийн холбоо"-ны гүйцэтгэх захирал Т.Баярсайхан үг хэллээ.

Тэрбээр, “Дэлхийн жижиг дунд үйлдвэрийн өдрийг тохиолдуулан үзэсгэлэн, арга хэмжээг зохион байгуулж байна. Бид жилд нэг сая гутал үйлдвэрлэж байна. Монголын арьс ширний салбарынхан сэргэлттэй байгаа. Цар тахлын үед ч салбарын экспорт зогсоогүй. Европын орнууд, турк, итали, испани болон хятад солонгос зэрэг орон руу хагас болвсруулсан арьс ширийг гаргаж байна.

Мөн 20 мянга гаруй савхин хувцас, нэхий дээл үйлдвэрлэж, Оюу толгой ХХК-д 260 мянга гаруй ямааны арьсан ажлын бээлийг нийлүүлж байна.

Түүнчлэн 360 мянган гоёлын буюу савхин бээлий үйлдвэрлэн зах зээлд гаргадаг. Арьс ширний үйлдвэр ч тун удахгүй Улаанбаатар хотоос нүүхээр болсон, нүүлгэх тогтоол ч гарсан. Үүнийг баяртайгаар хүлээн авч, хамтран ажиллаж байгаа.

Энэ жил "Гутал" гэх нэрэн дор үйлдвэрлэгчдийн зөвөлгөөнийг зохион байгуулсан. Үүний хүрээнд бид 3 сая гутал үйлдвэрлэх зорилт тавьсан.

20-оод жил уламжлал болгон явуулж буй ноос ноолуур, арьс ширэн бүтээгдэхүүний үзэсгэлэнг аравдугаар сард Мишээл экспод зохион байгуулна. Гутал цүнх үйлдвэрлэгчдийн уралдааныг 9, 10 сард зохион байгуулдаг. Монголын арьс ширэн бүтээгдэхүүн үйлдвэрлэлийн салбар маш сайн хөгжиж байгаа.

Та бүхэн нэг бүтээгдэхүүн худалдаж авснаар 10 хүний ажлын байрыг хадгалж байна гэсэн үг. 

Иргэд худалдан авснаар бид бүхэн бүтээмжээ сайжруулна. Өртгөө багасаж, үнээ бууруулах боломжтой болно” гэв.

М.Дэвээ