Арьс шир, ноос ноолуур, органик хүнс, оёмол бүтээгдэхүүн үйлдвэрлэл, мэдээллийн технологи болон гар урлалын чиглэлээр дотоод, гадаадын нийт 200 гаруй аж ахуйн нэгж “Дэлхийн жижиг, дунд үйлдвэрийн өдөр-2023” үзэсгэлэн худалдаанд оролцож байна. Монгол хүний ур ухаан, хөлс хөдөлмөр шингэсэн эцсийн бүтээгдэхүүнийг төв талбайд дэлгэжээ.
Ургамлын цайнаас эхлээд эмээл хазаар, оньсон тоглоом, бүрэн сийлбэрт гэр, 20 сая төгрөгийн шатраас 200 сая төгрөгийн үнэтэй гэр хүртэл байв.
Чухам үйлдвэр эрхлэгчийн цаг хугацаа, нарийн нандин бодомж, сэтгэлгээний цар хүрээг хийц, ухлаадас, тоноглол, утаснаас нь ч харж болохоор байв.
Сүхбаатарын талбайд гурван өдрийн турш үргэлжлэх арга хэмжээний салхийг хагалж, “Арьс ширний үйлдвэрлэл”-ийнхэн ололт амжилт, онцлох бүтээгдэхүүнээ танилцуулсан юм. Мөн үндэсний хувцасны загварын үзүүлбэр, язгуур урлагийн бүтээлээс толилууллаа.
Маргааш буюу энэ сарын 27-ны өдөр ноос ноолуур, 28-ны өдөр органик бүтээгдэхүүн үйлдвэрлэгчид мөн адил өөрсдийн бүтээгдэхүүнийг түүхий эд байхаас нь эцсийн бүтээгдэхүүн болгон хэрэглэгчийн гарт хүргэхдээ туулдаг зам, шат дамжлагын тухай ярих болно.
Түүнчлэн НҮБ-ын Ерөнхий ассемблейгаас жил бүрийн зургадугаар сарын 27-ныг “Дэлхийн жижиг, дунд үйлдвэрийн өдөр” болгон тэмдэглэн өнгөрүүлдэг билээ. Энэ нь дэлхийн эдийн засаг, нийгмийн тогтвортой хөгжилд жижиг, дунд үйлдвэр эрхлэгчдийн оруулсан хувь нэмрийг олон нийтэд сурталчлах, дэмжих зорилготой шийдвэр байжээ. Манай улсын тухайд тус өдрийг тохиолдуулан Засгийн газрын хэрэгжүүлэгч агентлаг Жижиг, дунд үйлдвэрийн газраас жил бүр үзэсгэлэн худалдаа зохион байгуулдаг байв. Харин өдгөө Монгол Улсын Ерөнхийлөгчийн санаачлагаар Улаанбаатар хотноо зохион байгуулж буй "Дэлхийн экспортыг дэмжих форум"-тай хамтатгаснаараа илүү өргөн хүрээг хамарчээ.
Зөрж өнгөрөх жуулчид арьсан бүтээгдэхүүнийг нэгд нэгэнгүй нэгжин үзэж, гайхширч яваа харагдах бол нэгэн үйлдвэрлэгч “Дөнгөж сая боловсруулсан арьсаа хятадуудад борлуулчихлаа” хэмээн зогссон юм.
Мөн “үндэсний үйлдвэрлэлээ дэмжье гэхээр хэтэрхий үнэтэй” гэж шүүмжлэх хүнтэй ч таарлаа. Аливаа зүйлийн хоёр тал гэдэг нь үүн шиг билээ. Үүний зэрэгцээ Монгол Улсын Засгийн газраас экспортыг дэмжих, ялангуяа уул уурхайн бус экспортын бүтээгдэхүүний үйлдвэрлэл, хэмжээг нэмэх зорилгоор "Экспортлогчдын тэмдэглэлт өдөр"-тэй болох шийдвэрийг 2020 онд гаргасантай холбогдуулан энэ жилийн узэсгэлэнд дотоодын экспортлогч аж ахуйн нэгжүүд бүтээгдэхүүнээ танилцуулж, үйлдвэрийн үнээр борлуулж байна. Гэхдээ зөвхөн зарах бус дотоодод үйлдвэрлэсэн бүтээгдэхүүнийг экспортлогч аж ахуйн нэгжүүд, олон улсын төсөл хөтөлбөрүүдийн дэмжлэг авсан аж ахуйн нэгж болон гадаадын экспортлогч нарт бүтээгдэхүүнээ олон нийт болон хөрөнгө оруулагч, худалдааны түнш байгууллагуудад танилцуулахад уг арга хэмжээний бас нэгэн зорилго.
Хөгжиж буй орнуудын худалдаа, экспортыг дэмжих, жижиг үйлдвэрүүдийг бараа бутээгдэхүүнээ олон улсын зах зээлд гаргах, дэлхийн бус нутгийн нэмүү өртгийн сулжээнд нэгтгэхэд дэмжлэг үзүүлэх зорилготой юм. Тус үзэсгэлэн худалдаа энэ сарын 28-ныг хүртэл Сүхбаатарын талбайд үргэлжилнэ.
