"Дэлхийн жижиг, дунд үйлдвэрийн өдөр-2023" үзэсгэлэн худалдаа Сүхбаатарын талбайд хоёр дахь өдрөө үргэлжилж байна. Уг үзэсгэлэн худалдаанд арьс шир, ноос ноолуур, органик хүнс, оёмол бүтээгдэхүүн үйлдвэрлэл, мэдээллийн технологи болон гар урлалын чиглэлээр дотоод, гадаадын нийт 200 гаруй аж ахуйн нэгж оролцож буй. Үзэсгэлэн худалдааны хоёр дахь өдөр буюу өнөөдөр ноос ноолуурын салбарын өдөр боллоо.
Маргааш буюу энэ сарын 28-ны өдөр органик бүтээгдэхүүн үйлдвэрлэгчид мөн адил өөрсдийн бүтээгдэхүүнийг түүхий эд байхаас нь эцсийн бүтээгдэхүүн болгон хэрэглэгчийн гарт хүргэхдээ туулдаг зам, шат дамжлагын талаар олон нийтэд хуваалцах юм.
Ийнхүү уншигч та бүхэнд уг үзэсгэлэнд оролцож буй жижиг дунд үйлдвэрлэл эрхлэгчидтэй хэсэг хором ярилцсанаа хүргэе.
Д.Баярхуяг: Шатрыг хийц ураас нь шалтгаалаад гадаад, дотоодын хүмүүс их сонирхож байна
Тэрбээр "Монгол дарханы дуут урлангийн хамт олон бид энэхүү үзэсгэлэнд оролцож байгаадаа баяртай байна. Энэ үзэсгэлэнд Дуут урлангийн брэндүүд болох үндэсний өв соёлыг шингээсэн Монгол шатруудаараа оролцож байна. Шатар гэдэг бол зөвхөн Монголыг гэлтгүй Дэлхийн оюуны спортын гайхамшиг шүү дээ. Хийц ураас нь шалтгаалаад гадаад дотоодын хүмүүс их сонирхож байна.
Дэлхий дээр бид өв соёлоороо ондооших ёстой гэж боддог. Эх орноо хайрлаж, хүндэлж, эх орноороо бахархах хэрэгтэй. Тэр хүндлэлийн маань илрэл нь энэ өв соёлыг урлаж байгаа минь гэж боддог.
Шатраас гадна 2023 онд гаргасан загвар болох Цацал гэдэг бүтээлээрээ оролцож байна. Цацал бол үе дамжихаар гуулин цутгамал бөгөөд маш нарийн хийцтэй. Айл болгонд нэг цацал байх нь сайхан шүү дээ. Дуут урлан ХХК-ийн цахим хуудсан дээр бидний хараагүй, яриагүй олон загвар, бүтээгдэхүүнүүд бий. Бид хэн бүхэнтэй хамтарч ажиллахад нээлттэй шүү гэдгийг энэ дашрамд хэлье" гэв.
М.Болорчимэг: "Сор кашемир" БНСУ, БНХАУ, Итали зэрэг улсууд руу бүтээгдэхүүнээ экспортлодог
Тэрбээр "Сайн байна уу. “Сор кашемир” ХХК-ийн сошиал маркетинг менежер М.Болорчимэг байна. “Сор кашемир” ХХК 1998 онд үүсгэн байгуулагдсан. Үүсгэн байгуулагдсан цагаасаа хойш тасралтгүй 25 жил үйл ажиллагаа явуулж байна.
Бид сарлагийн хөөвөр, хонины ноос, тэмээний ноос, ямааны ноолуур зэрэг бүтээгдэхүүнүүдийг малчдын гар дээрээс авдаг. Түүхий эдээ авсны дараа ангилж ялгах, угаах, самнах, ээрэх, сүлжих гээд цамц хүртэлх бүх дамжлагыг цогцоор нь хийдэг.
Мөн дан ганц бүтээгдэхүүн хийхээс гадна ээрмэл утас үйлдвэрлэн дотоод болон гадаадад худалдаалдаг. Манай компанийн 90 хувийг экспортын худалдаа эзэлдэг. Угаасан ноолуур, тэмээний ноос, сарлагийн хөөврийн БНХАУ-руу гаргаж байна. Харин самнасан тэмээний ноос, сарлагийн хөөврийг Итали улс руу, сүлжмэл бүтээгдэхүүнүүдийг БНСУ руу экспортолдог. Энэ жилээс европын улсууд руу хүч түрэн ажиллаж байна. Мөн манай түүхий эд болох утсаар 200 гаруй цехүүд худалдан авч өөрсдийн бүтээгдэхүүнүүдээ үйлдвэрлэдэг" гэлээ.
С.Мөнхзаяа: Монгол үйлдвэрлэлүүд гадна үзэмж гэхээсээ илүү чанар, үйлдвэрлэлдээ анхаардаг болсон
Мөн энэ үеэр “Maris” компанийн үйл ажиллагаа хариуцсан захирал С.Мөнхзаяатай хэсэг хором ярилцлаа.
Тэрбээр “Maris” брэнд үүсгэн байгуулагдаад таван жил болжээ. Дотоодод байгаа арьсаа эцсийн бүтээгдэхүүн болгон гаргах зорилготой үйл ажиллагаа явуулдаг. 100 хувь цэвэр арьсаар бүтээгдэхүүнүүдээ урладаг.
Maris гэдэг бол Монгол арьс гэдэг үгний товчлол юм. Тиймдээ ч монгол арьсыг олон улсын зах зээлд таниулах зорилготой. Цүнх, жижиг эдлэлийн үйлдвэрлэл явуулдаг.
Цүнх гэхэд л дотроо маш олон төрөл бий. Нийт 210 орчим бүтээгдэхүүний нэр төрөл байгаа. Одоогийн байдлаар АНУ, Герман улс руу экспортод гаргаж байна. Гаднын жуулчид их сонирхож байна. Тэр тусмаа “Гэр” коллекцыг сонгож худалдан авалт хийж байна.
Мөн жижиг эдлэлүүдийг оёсон утсыг их сонирхож байна. Гадаадын брэндүүдтэй ижилхэн болсон байна, чанар нь гоё байна, Монгол юм уу гээд л зарим нь итгэхгүй байна. Монгол үйлдвэрлэлүүд гадна үзэмж гэхээсээ илүү чанар, үйлдвэрлэлдээ анхаардаг болсон” гэлээ.
Д.Батчулуун
