"Дэлхийн жижиг, дунд үйлдвэрийн өдөр-2023" үзэсгэлэн худалдаа Сүхбаатарын талбайд хоёр дахь өдрөө үргэлжилж байна. Энэ үеэр "Дуут урлан" ХХК-ийн менежер Д.Баярхуягтай ярилцлаа.
-Танд энэ өдрийн мэндийг хүргэе. Энэхүү арга хэмжээнд Дуут урлан ямар бүтээгдэхүүнээр оролцож байна вэ?
-Монгол дарханы дуут урлангийн хамт олон бид энэхүү үзэсгэлэнд оролцож байгаадаа баяртай байна. Энэ үзэсгэлэнд Дуут урлангийн брэндүүд болох үндэсний өв соёлыг шингээсэн Монгол шатруудаараа оролцож байна. Шатар гэдэг бол зөвхөн Монголыг гэлтгүй Дэлхийн оюуны спортын гайхамшиг шүү дээ. Хийц ураас нь шалтгаалаад гадаад дотоодын хүмүүс хүмүүс их сонирхож байна.
-Шатрын тухайд нийт хэдэн төрөл байгаа вэ?
-Шатрын 30 орчим төрлүүд бий. Тухайлбал, түүх өв соёл, уламжлалт, сэтгэлгээний зэрэг олон төрөл байгаа л даа. Харин энэ удаад арав гаруй төрлийн шатраар оролцож байна. Бид Чингис хааныхаа зургийг архины шилэн дээр гаргадаг байж яагаад шатар дээр бахархалтайгаар урлаад, алтаар шарж болохгүй гэж хэмээн урласан.
-Шатраас гадна өөр бүтээлүүд урладаг уу?
-Шатраас гадна 2023 онд гаргасан загвар болох Цацал гэдэг бүтээлээрээ оролцож байна. Цацал бол үе дамжихаар гуулин цутгамал бөгөөд маш нарийн хийцтэй. Айл болгонд нэг цацал байх нь сайхан шүү дээ.
-Та гар урлалын чиглэлийн мэргэжилтэй хүн үү?
-Би мужаан мэргэжилтэй хүн л дээ. Хүүхэд өсвөр наснаасаа үндэсний өв соёлоо хайрлаж, бахархаж өслөө. Дэлхий дээр бид өв соёлоороо ондооших ёстой гэж боддог. Эх орноо хайрлаж, хүндэлж, эх орноороо бахархах хэрэгтэй. Тэр хүндлэлийн маань илрэл нь энэ өв соёлыг урлаж байгаа минь гэж боддог.
-Таны урласан бүтээлүүдийг харахад түүхийн талаар их сонирхдог бололтой?
-Би гэдэг хүн түүх ярьдаг хүн шиг болоод хувирчих юм. Түүх судлаач нарын хажууд бид өчүүхэн жижиг хүмүүс шүү дээ. Гэхдээ олон түмэнд өв соёлоо түгээн дэлгэрүүлэн сурталчилж байгаадаа баяртай байдаг.
Бид чадах чинээгээрээ түүхээ судалж, ёс заншлаа гажуудуулж, өөрчилж болохгүй санагддаг.
-Дуут урланг сонирхож буй уншигчдад хандан юу гэж хэлмээр байна вэ?
-Дуут урлан ХХК-ийн цахим хуудсан дээр бидний хараагүй, яриагүй олон загвар, бүтээгдэхүүнүүд бий. Бид хэн бүхэнтэй хамтарч ажиллахад нээлттэй шүү гэдгийг энэ дашрамд хэлье.
-Ярилцсанд баярлалаа.
-Баярлалаа
Д.Батчулуун
