Хуульч, өмгөөлөгчид, иргэний нийгмийн байгууллагууд, сэтгүүлчид нэгдэн нийтийн эрхийг зөрчиж буй фактууд дээр ажиллаж эхэлж байгаа талаар мэдээллээ.
Энэ үеэр хуульч, өмгөөлөгч Г.Дашдэмбэрэл ярихдаа, “Хүмүүсийн урт нэртэй хууль гэж цоллоод байгаа “Гол мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай" хуулийн хүрээнд Монгол Улсын Засгийн газар нөөц сангаасаа 2009 онд хөрөнгийг нь гаргаад 2011 онд нийт 245 алтны шороон орд дээр 8000 га газрын эвдэгдэж, сүйтгэгдсэн талбайн хэмжээ 1.1 их наяд төгрөгийн хохирол төлбөр гарсан гэдгийг анх тооцож гаргасан. Уг асуудал одоог хүртэл үргэлжилж 12 жилийн хугацаанд яригдаж байна.
Монгол Улсын Засгийн газар 2020-2024 оны үйл ажиллагааны мөрийн хөтөлбөртөө энэ 8 мянган га газрыг нөхөн сэргээж, жилдээ 2000 га газрыг нөхөн сэргээнэ гэсэн энэ асуудлын хүрээнд хийгдэж байгаа ажлууд нь юу вэ гэдэг нь маш тодорхойгүй байгаа.
Тиймээс Нийтийн эрхийг хамгаалах сүлжээний эхний асуудал бол Засгийн газрын мөрийн хөтөлбөрийг хэрэгжүүлэхийг шаардаж, үүнийгээ зарлаж хийж байгаа ажил. Мөн ирээдүй хойчийнхоо эрх ашгийг хамгаалах ажлыг эхлүүлж, иргэд, иргэний нийгмийн байгууллагууд нэгдэх боломжтой гэдгийг зарлаж байна" гэв.
