Энэ сарын 26-ний 21 цагийн үед Говь-Алтай аймгийн Нэгдсэн эмнэлэгт Бугат сумаас шинж тэмдэг тодорхойгүй үжил халдвар оноштой ирсэн өвчтөн тарваган тахлын сэжигтэй тохиолдлоор бүртгэгдэж Аймгийн Онцгой комисс яаралтай хуралдаж аймгийн төвөөс гарах бүх хөдөлгөөнийг 2023 оны 06 дугаар сарын 27-ны өдрийн 02 цагаас 6 хоногийн хугацаатай бүрэн хязгаарлах, Бугат сумд өндөржүүлсэн бэлэн байдал зарлаад байна.
Тухайн сэжигтэй тохиолдын шинжилгээний хариу гарсан тухай Говь-Алтай аймгийн Эрүүл мэндийн газрын дарга Г.Лхагважаргал мэдээлэл өглөө.
Тэрээр: "Сэжигтэй тохиолдол урд шөнө 01:10 минутад булчирхайн төрлийн тарваган тахал гэдэг нь батлагдлаа. 13 цагийн хурлаар бид булчирхайн хэлбэрийн тахлын хувьд эрүүл мэндийн сайдын 2017 оны 160-р тушаалаар арга хэмжээ авах цаашид хөл хориог яаж цуцлах уу? ямар нөхцөл байдалд байх вэ гэдэг талаар бол манай эрүүл мэндийн газраас санал орууллаа.
1-рт: нэгдүгээр хавьтлаа бүгдийг нь хяналтдаа авсан.
2-рт: өвчтөний биеийн байдал бол сайжирсан. Бусад эрхтэнд бол хүндрэл гараагүй.
3-рт: эмнэлзүйн эмч нарын маань дүгнэлтээр булчирхайн хэлбэрийн дүгнэлт гарсан. Булчирхайн хэлбэрийн тахал хүндрэлгүй гэсэн.
Хэрвээ амьсгалын юм уу бусад өөр хэлбэрээр байх юм бол цааш цаашдаа хорио үргэлжлээд явна. Хэрвээ хяналтад байж байхдаа 1-р хавьтлаас халуурах ч юм уу? элдэв шинж тэмдэг илэрсэн байх юм бол энэ хорио маань зургаа хоногоор сунгагдаад явах ёстой. Бугат сумын хувьд маргааш 6 дахь хоног нь байна. Маргааш хянаж шалгана. Үндсэн голомтууд маань Бугат суманд байна. Маргаашийн хуралдаанаар Бугат сумын асуудлыг 2-рт тэр эписиод дээр ажиллаад ирсэн хүмүүсийн илтгэлийг хүлээж аваад цаашид ямар арга хэмжээ авч урьдчилан сэргийлэх вэ гэх ийм асуудлыг хэлэлцэх учраас өнөөдөртөө зөвхөн аймгийн төвийн хөл хориог цуцлах саналыг хэлэлцсэн.
Булчирхайн хэлбэр гэдэг нь ихэвчлэн яг ахуйн хавьтлын замаар халддаг. Ихэвчлэн ямар хүмүүст байна вэ гэхээр тарвагыг өвчсөн, бүүргэнэд хазуулсан хүмүүс тийм хүмүүст ихэвчлэн тохиолддог. Онцгой тохиолдол нь яг батлагдаад хүндрэл үүсээгүй байгаа тохиолдолд харьцангуй 6 хоног дотроо амьсгалын замын халдвараас арай бага байдаг.
Голомтод ажилласан баг албан ёсоор илтгэх хуудсаа өгөөгүй байна. Гэхдээ урьдчилсан аман мэдээгээр бол тэнд мансууралтай тарвага мөн сэг зэмүүд байна гээд тэндээсээ дээжүүд авчирсан байна. Тэдгээр дээжүүдээ шалгаад тогтоолгоно. Говь-Алтай аймаг нь тарваган тахлын голомт өндөртэй маш эрсдэлтэй тохиолдлууд 1973 оноос хойш нэлээн олон удаа илэрч байсан. Тарваган тахлын өндөр идэвхжилтэй өндөр эрсдэлтэй бүс. Ийм учраас ард иргэд тарвага агнахгүй, өөр төрлийн мэрэгчид үхсэн байвал сэг зэмийг нь оролдохгүй байх хэрэгтэй. Тарвага агнах хуулиар хориотой байгаа. Хэрэв оролдоод тарваган тахлын шинж тэмдэг буюу халуурах гүйлгэх гэх мэт шинж илэрвэл яаралтай эрүүл мэндийн байгууллагат хандаж үнэн зөвөөр мэдээллээ өгөөрэй.
Саяын шийдвэр гарахад хамгийн гол нөлөөлж байгаа зүйл бол ойрын хавьтлуудын биеийн байдал. Гурван гол объект байна. 1-рт Цэргийн ангийн малын тэр хэсэг, 2-рт Бугат сум болон сумын эрүүл мэндийн төв, 3-рт аймгийн төв байна. Энэ гурван газарт байгаа ойрын хавьтлуудаас өөр шинж тэмдэг илрээгүй. Бүх хүмүүсийн биеийн байдал хэвийн байна. Энэ хүмүүсийн биеийн байдлыг бид 2 цаг тутамд шалгаж тэмдэглэж Зооноз өвчин судлалын үндэсний төвд цаашлаад эрүүл мэндийн яаманд илгээж байгаа. Ойрын хавьтлуудыг 6 хоног ажиглана. Ямар нэгэн шинж тэмдэг байхгүй бол чөлөөтэй явж болно" гэлээ.
