Нэгдсэн Үндэстний Байгууллагын Ерөнхий нарийн бичгийн даргын цэргийн зөвлөх, генерал Бирами Диоп Зэвсэгт хүчний Жанжин штабын даргын урилгаар манай улсад албан ёсны айлчлал хийж байна. Түүнийг өнөөдөр буюу зургадугаар сарын 29-ний өдөр Монгол Улсын Зэвсэгт хүчний Жанжин штабын дарга бригадын генерал С.Ганбямба хүлээн авч уулзлаа.

НҮБ-ын Ерөнхий нарийн бичгийн даргын цэргийн зөвлөх эрхэм генералыг Төрийн хүндэт харуул угтан авч, ЗХЖШ-ын удирдлага, бүтцийн нэгжийн дарга нар, төрлийн цэргийн командлалын удирдлагууд угтан авч албаны уулзалтыг зохион байгууллаа.

Уулзалтаар Монгол Улсын Зэвсэг хүчний цэргийн алба хаагчдын Энхийг сахиулах ажиллагаанд үүрэг гүйцэтгэсэн болон өнөөгийн байдал, цаашдын оролцоо, ач холбогдлын талаар санал солилцлоо.

ЗХЖШ-ын дарга хэлэхдээ миний урилгыг хүлээн авч манай улсад айлчлан ирсэн эрхэм танд талархал илэрхийлье хэмээн Монгол Улсын Зэвсэгт хүчин 2002 оноос эхлэн НҮБ-ын энхийг сахиулах ажиллагаанд энхийг сахиулагч цэргийн алба хаагчдаа илгээн даян дэлхийн энх тайвны төлөө хувь нэмрээ оруулж, үүргээ амжилттай гүйцэтгэж байгаа талаар дурдаад энхийг сахиулах ажиллагаанд оролцох оролцоо, цэргийн алба хаагчдын чадавхыг нэмэгдүүлэх зэрэг асуудлыг хөндөн ярилцлаа.

Мөн цэргийн зөвлөх, генерал Бирами Диоп хэлсэн үгэндээ Монгол Улсын энхийг сахиулагчид НҮБ-ын Энхийг сахиулах ажиллагаанд бусад улс орны энхийг сахиулагчдыг мэргэшсэн байдал, сахилга бат, тэсвэр хатуужил, хичээл зүтгэлээрээ манлайлж, тавигдсан үүргийг амжилттай биелүүлдэгт Зэвсэгт хүчний удирдлагад талархал илэрхийлээд, цаашид танай улсын энхийг сахиулагчдын оролцоог нэмэгдүүлэхэд НҮБ үргэлж талархан дэмжих болно гэсэн юм.

Генерал Бирами Диопын албан ёсны айлчлал 2023 оны 6 дугаар сарын 29-ний өдрөөс 7 дугаар сарын 03-ны өдрүүдэд үргэлжлэх бөгөөд Монгол Улсад 19 дэх жилдээ явагдаж буй “Хааны эрэлд-2023” энхийг сахиулах ажиллагааны олон улсын хамтарсан сургуулийн явц байдалтай танилцаж, тус сургуулийн хаалтын арга хэмжээнд оролцоно.

Эх сурвалж: Зэвсэгт Хүчний Жанжин Штаб