Аяллын улирал эхэлж Баян-Өлгий аймгийг  зорих гадаад, дотоодын аялагчдын тоо нэмэгдэж байгаатай холбогдуулан тус аймгийн аялал жуулчлалын гол маршрутуудаар яүйлчлэх таксины үнэ хөлсийн талаарх мэдээллийг хүргэж байна.

Сүүлийн жилүүдэд Улаанбаатар хот болон бусад аймгуудын аялагчид Өлгий хот хүртэл жижиг машинаар ирж, тэндээс туулах чадвар сайтай машин тэрэг хөлслөн цаашаагаа явдаг болсон. Учир нь аялагчид олноор очдог тус аймгийн аялал жуулчлалын бүс нутгууд болох Алтай Таван богд, Цамбагарав, Хотон, Хурган нуур, Бага Түргэний хүрхрээний зам бартаатай байдаг.

Энэ жилийн хувьд Өлгий-Алтай Таван богд-Өлгий чиглэлд үйлчлэх таксины үнэ шатахуун, жолоочийн хөлсийг нэмээд 800 мянган төгрөг байна. Нийтдээ 400 гаруй км зам туулна. Харин Өлгий-Алтай Таван богд-Хотон, Хурган нуур-Бага Түргэний хүрхрээ-Өлгий гэсэн маршрутаар 700 орчим км аялахад 1,3-1,4 сая төгрөг төлнө. Өлгий-Цамбагарав уул-Өлгий маршрутаар 500 мягнан төгрөгөөр аялж болно.

Аялагчид зорчих хүний тоо, тав тухтай байдлаасаа хамааран Уаз Пургон (8-10 хүний суудалтай), Уаз-468, Land Cruiser 80, 100, 105 маркийн машинуудаас сонголт хийх боломжтой бөгөөд үйлчилгээний хөлс адилхан байна.