Харилцаа холбооны зохицуулах хорооноос Старлинк сервисес Монголиа компанид үйлчилгээ эрхлэх тусгай зөвшөөрөл олголоо. Тус зөвшөөрлийн гэрчилгээг Харилцаа холбооны зохицуулах хорооны дарга Г.Чинзориг гардуулж өглөө. Ингэснээр алслагдсан сумуудыг интернэт сүлжээнд холбохоос гадна ажлын байр бий болгох, хөрөнгө оруулалтууд татах зэрэг боломжийг нээж байна. 

Н.Учрал: Гадаадын компанид зөвшөөрөл олгож байгаа ч дотоодын зах зээлээ орхигдуулалгүй хамгаална

Уг тусгай зөвшөөрөл гардуулах ёслолд Цахим хөгжил, харилцаа холбооны сайд Н.Учрал оролцож үг хэллээ.

Тэрбээр "Харилцаа холбооны салбар бол зоосны хоёр тал шиг. Нэг талаасаа их хатуу дэд бүтэц, нөгөө талаасаа зөөлөн дэд бүтэц. Иймд өнгөрсөн хугацаанд дэд бүтцээ сайжруулах, бэхжүүлэхэд анхаарч ажилласан. Өнөөдрийн байдлаар 21 аймаг, 330 сумаас өндөр хурдны шилэн кабельд 325 сум холбогдоод байгаа. Энэ онд үлдсэн сумуудыг холбоно. 1226 багийг холбохоор холболтууд хийгдсэн. Манайх шиг өргөн уудам газар нутагтай улсын гуравны нэгт сүлжээ холбогдсон. Өнгөрсөн 15 жилийн хугацаанд интернетийн үнэ тариф долоо дахин буурсан гэх статистик мэдээлэл бий.

Харилцаа холбооны салбар нэг жилд борлуулалтын орлого 1,9 их наяд төгрөг хүрсэн. Ийнхүү улсын төсвөөс ямар нэг мөнгө шаардахгүйгээр өөрсдийн орлогоор сумдуудыг, багуудыг шилэн кабельд холбосон. 

Энэ оны гуравдугаар сард Барселон хотод зохион байгуулагдсан хурлын үеэр Space X, OneWeb зэрэг нам орбитын хиймэл дагуулын үйлчилгээ эрхлэгч байгууллагуудтай уулзаж, туршлага судалсан. Энэ цаг үетэй зэрэгцэн Зөвшөөрлийн тухай хуулийг шинэчлэн найруулж баталсан. Уг хуулийн зарчмын гол заалтуудын нэг болох хуульд заагаагүй нөхцөл, шаардлагыг ямар ч салбарт нэмж шаардахгүй гэснийг үндэслэн өмнөх баримтлах чиглэлийг гуравдугаар сард хүчингүй болгосон. Мөн өнгөрсөн сард Ерөнхий сайд Л.Оюун-Эрдэнэ Илон Масктай цахимаар уулзаж, санал солилцсон. Уулзалтын үеэр Илон Маск Старлинк компанид үйлчилгээ явуулах зөвшөөрөл олгох, энэ тухай хууль эрх зүйн өөрчлөлт хийх зөвлөмж өгсөн. Гадаадын компанид зөвшөөрөл олгож байгаа ч дотоодын зах зээлээ орхигдуулалгүй хамгаална" гэв. 

Мөн үргэлжлүүлэн Space X компанийн Засгийн газрын харилцаа хариуцсан ахлах менежер Ребекка Хантерийн зүгээс манай орныг чухал зах зээл хэмээн онцлов. Тэрбээр мөн үйлчилгээнд ашиглах хиймэл дагуулын тавгийг танилцуулсан юм.

Space X компани хиймэл дагуулд суурилсан өндөр хурдтай интернэт үйлчилгээг дэлхийн 50 гаруй оронд нэвтрүүлсэн. Тэдгээр орны тоонд Монгол Улс ийнхүү багтаж байна.

Тус төхөөрөмжийг ажиллуулахад эрчим хүчний үүсвэр л хэрэгтэй аж. Хиймэл дагуулаас хүлээн авсан дохиог wifi рүүтэр интернэт сүлжээ болгон цацна. Тус хиймэл дагуулын тавгийг суурилуулахад суурин дэд бүтэц, ямар нэг шугам холбох шаардлагагүй бөгөөд маш хөнгөн, зөөвөрлөх боломжтойгоороо онцлог юм.

Д.Батчулуун