Цаг уур, орчны шинжилгээний газраас гаргасан урьдчилсан мэдээллээр Үндэсний их баяр наадмын өдрүүдэд төвийн аймгуудаар дуу цахилгаантай аадар бороо орохыг анхааруулж байна.

Тодруулбал,  долдугаар сарын 11-нд баруун аймгуудын нутгийн зарим газар, төвийн аймгуудын нутгийн ихэнх, зүүн аймгуудын нутгийн зарим газраар, долдугаар сарын 12-нд баруун аймгуудын ихэнх нутаг, төвийн аймгуудын нутгийн баруун хэсгээр, зүүн аймгуудын нутгийн зарим газраар,  долдугаар сарын 13-нд баруун аймгуудын нутгийн зүүн, төвийн аймгуудын нутгийн өмнөд хэсэг, говийн аймгуудын ихэнх нутаг, зүүн аймгуудын нутгийн зарим газраар, долдугаар сарын 14-нд нутгийн зүүн өмнөд хэсгээр бороо, дуу цахилгаантай аадар бороо орно.

Салхи ихэнх хугацаанд секундэд 5-10 метр, нутгийн зарим газраар борооны өмнө түр зуур ширүүснэ. Монгол-Алтай, Хангай, Хөвсгөлийн уулархаг нутаг, Завхан голын эх, Хүрэнбэлчир орчим, Идэр, Тэрэлж голын хөндийгөөр шөнөдөө 5-10, өдөртөө 18-23, Алтайн өвөр говиор шөнөдөө 18-23, өдөртөө 33-38, говийн бүс нутгийн өмнөд хэсгээр шөнөдөө 13-18, өдөртөө 29-34, бусад нутгаар шөнөдөө 10-15 хэм, өдөртөө 23-28 хэм дулаан байна. Мөн долдугаар сарын 12, 13-нд нутгийн хойд хэсгээр сэрүүснэ.