"Кино урлагийн зөвлөл" болон "Иргэдийн цахим оролцоо" ТББ хамтран Кино урлагийг дэмжих сангаас дэмжлэг аван "Кино нүүдэл" гэх олон улсын сургалтын хөтөлбөр зарласантай холбоотой хэвлэлийн бага хурлыг зохион байгууллаа. Энэ үеэр КУЗ-ын гишүүн Т.Номуунзул үг хэллээ.   

Тэрбээр "Кино урлагийн зөвлөлийн хуулиар хариуцсан үүргийн нэг бол салбарынхаа боловсон хүчнийг чадавхжуулах явдал. Энэ чиглэлээрээ он гарснаас хойш гурван сургалт зохион байгуулсан. Мөн салбарынхаа чиглэл, чиглэлийн уран бүтээлчдийг хүлээн авч уулзаж, аль салбарт ямар сургалтыг хийх хэрэгтэй байгаа талаарх санал асуулга болон суурь судалгааг хийсэн юм. Үүндээ тулгуурлан кино төсөл боловсруулах, кино түгээлт маркетинг, кино шүүмж, судлалын богино хэмжээний сургалтыг зохион байгуулсан. Энэ сургалт дөрөв дэх нь болж байна.

Бидний хувьд судалгаанд суурилсан хамгийн чухал, хөндөх ёстой сэдэв бол кино зохиол болон кино төслийг хэрхэн бичих асуудал. Хамгийн сайн кино, сайн зохиолтой байдаг.

Нэгт, хоёрт, гуравт сайн зохиол гэдэг. Тэгэхээр кино зохиол бичнэ. Түүнийгээ хөгжүүлэх, ажиллах нь чухал. Олон улсад ч ялгаагүй. Сайн зохиолыг дэлгэцэнд хүргэх хүртэл маш урт хугацааг зарцуулдаг. Энэ нь хөрөнгө мөнгөтэй холбоотой байдаг. Үүнийг хийхийн тулд маш сайн төсөл болгож бичих шаардлагатай тулгарна. Олон улсад ч өндөр стандарттай. Сайн кино төсөл бичиж чадах юм бол гадна дотоодын пордюсер болон сангуудаас дэмжлэг авч, санхүүжилт олоход том түлхэц, суурь болдог. Тиймээс энэ хоёр асуудалд манай тал дээр сургалтууд болон гадны боловсон хүчнүүдтэй туршлага солилцох хэрэгтэй. Энэ хөтөлбөр уран бүтээлчдэд том боломжийг авч ирнэ гэж бид харж байгаа" гэв.