Катар Улсын Зэвсэгт хүчинтэй хамтарсан “Шийдэмгий шийдвэр-2023” сургуулийн нээлтийн үйл ажиллагаа Зэвсэгт хүчний сургалтын нэгдсэн төвд боллоо.

Нээлтийн үйл ажиллагаанд Зэвсэгт хүчний Тусгай хүчний цэргийн командлагч бригадын генерал Б.Баатар, Зэвсэгт хүчний Агаарын цэргийн штабын дарга бригадын генерал Б.Эрдэнэбат, Катар Улсын БХЯ-ны Монгол-Катарын харилцааг хариуцсан дарга, бригадын генерал Набеел Сорур, ЗХЖШ-ын Энхийг дэмжих, цэргийн хамтын ажиллагааны хэлтсийн дарга хурандаа Ж.Молорболд тэргүүтэй албаныхан болон “Шийдэмгий шийдвэр-2023” сургуульд хамрагдах цэргийн алба хаагчид оролцлоо.

Хамтарсан сургуулийг нээж Зэвсэгт хүчний Тусгай хүчний цэргийн командлагч бригадын генерал Б.Баатар хэлсэн үгэндээ “Уг сургууль нь хоёр улсын Зэвсэгт хүчний шилдэг дайчид өөрсдийн хуримтлуулсан туршлага, сургамж ба үйл ажиллагаагаар нь туршигдаж батлагдсан ажиллагааны арга техникүүдийг харилцан бие биедээ зааж сурган, туршлага мэдлэгээ хуваалцах өргөн боломжийг бүрдүүлдэг болохыг онцлоод сургуулийг хамтран зохион байгуулж байна" гээд Катар Улсын Зэвсэгт хүчний удирдлага ялангуяа бригадын генерал Набеел Сорур болон түүний багийнханд чин сэтгэлийн талархал илэрхийллээ.

Үргэлжлүүлэн Катар Улсын талын сургуулийн удирдагч Али Хаади Алхажри хэлсэн үгэндээ уг сургуулийг зохион байгуулахад гол дэмжлэг үзүүлсэн Монгол Улсын Зэвсэгт хүчинд талархаж буйгаа илэрхийлээд “Шийдэмгий шийдвэр” сургууль нь Катар Улсын сонсогч, офицеруудад олон зүйл сурах боломжийг олгосоор ирснийг онцлов.

“Шийдэмгий шийдвэр-2023” хамтарсан сургууль нь долдугаар сарын 19-ний өдрөөс наймдугаар сарын 7-ны өдрийн хооронд үргэлжлэх бөгөөд Катар Улсаас 450, Монгол Улсаас 100 гаруй цэргийн алба хаагч оролцож байна.

Эх сурвалж: "Соёмбо" редакц