УОК-оос цаг агаарын урьдчилсан мэдээ, халдварт өвчин, үер усны гамшгийн нөхцөл байдлын талаар мэдээлэл өглөө.
Тус үеэр ХӨСҮТ-ийн Халдварт өвчний тандалт судалгааны их сэрэмжлүүлэг, хариу арга хэмжээ авч хэрэгжүүлэх нэгжийн дарга Н.Сувдмаа “Манай улс эрс тэс уур амьсгалтай, халууны богино улиралтай тул энэ үед гэдэсний халдварын улирал болдог. Мөн сая болсон гэнэтийн үер усны аюул, үргэлжлэн болж буй хэт халалттай холбоотой цаг үед гэдэсний халдварт өвчний үзүүлэлт нэмэгдэхгүй, тайван байгаа ч иргэд үүнд тайвшралгүй мэргэжлийн байгууллагуудаас өгч байгаа сэрэмжлүүлгийг амьдрал ахуйдаа заавал дагаж мөрдөх шаардлагатай байна.
Хамгийн энгийн бөгөөд чухал арга бол гараа сайн угааж байх, үер усны аюулаас бага насны хүүхдүүдийг болон өөрийгөө сайн хамгаалах, анхаарал халамжаа сулруулахгүй байх, ямар нэгэн байдлаар гэдэсний халдварын зовиурын шинж тэмдэг илэрвэл эмнэлэгт хандах, эмчээс зөв мэдээлэл авч, зөв эмчилгээ авах хэрэгтэй.
Нэмээд хоол хүнсний аюулгүй байдлын таван зөвлөмж гэж байдаг. Ялангуяа хэт халалтын үед үүнийг онцгой анхаарах, сэрэмж, зөвлөмжийг онцгой дагах шаардлагатай. Хүнсний бүтээгдэхүүнийг зөв сонгож, заавал болгож хэрэглэх, хоол хүнсэнд хүрч, бэлтгэхийнхээ өмнө гараа савандаж сайтар угаах. Болсон болон түүхий бүтээгдэхүүнийг тус тусад нь хадгалах, тухайн бүтээгдэхүүнд хэрэглэгдэж байгаа хэрэгслүүдээ мөн тусгаарлаж хадгалах хэрэгтэй" гэв.
Мөн ундны усны аюулгүй байдлыг сайтар хангаж, усаа заавал буцалгаж хэрэглэх. Боломжтой бол аялал зугаалгаар явахдаа ундны цэвэр ус авч явж хэрэглэх зэрэг энгийн мэт боловч гэдэсний халдвараас бүрэн сэргийлэх боломжтой энэ аргуудыг амьдрал ахуйдаа зөв хэрэглэхийг зөвлөлөө.
Гараа угаах боломжгүй бол спиртэн суурьтай гар ариутгагч хэрэглэх, аялалд явахдаа хурдан хугацаанд муудах бүтээгдэхүүнээс татгалзах зэрэг энгийн зөвлөмжүүдээ заавал дагаж мөрдөхийг онцгойлон анхаарууллаа.
