Динозаврын өлгий, говийн аялал жуулчлалын бүс нутаг болох Өмнөговь аймгийн Булган сумын Баянзагт “Динозавр фестиваль-2023” үйл ажиллагааг анх удаагаа амжилттай зохион байгуулж байна. Тус арга хэмжээ 2023 оны 7 дугаар сарын 29-30-ны хооронд буюу нэг шөнө хоёр өдрийн турш зохион байгуулагдах бөгөөд нээлтийн арга хэмжээ өргөн дэлгэр болов.Нээлтийн үйл ажиллагаанд гадаад дотоодын аялагчид, орон нутгийн иргэд 1000 гаруй хүн оролцлоо.
Монголын палеонтологийн хайгуул судалгааны 100 жилийн түүх, ололт амжилтыг дэнсэлж, ойлгон таниулах, олон нийтэд түгээн дэлгэрүүлэхийн зэрэгцээ эртний өвөрмөц түүх, мартагдашгүй өв соёлыг аялал жуулчлал, шинжлэх ухаантай хослуулан зохиож байгаагаараа тус үйл ажиллагаа онцлог болж байна.
Шинжлэх ухааны чиглэлээр олон улсын хэмжээнд нээлттэй зохион байгуулагдаж байгаа анхны томоохон үйл ажиллагаа болох Динозавр фестивалийг ШУА-ийн Палеонтологийн хүрээлэнгээс санаачлан зохион байгууллаа. Энэ жилийн үйл ажиллагаа "Өндөг" сэдвийн дор зохиогдож байгаа бөгөөд цаашид жил бүр өөр өөрийн зорилго, онцлогийн харуулан уламжлал болон зохион байгуулагдах юм.
Үлэг гүрвэл нь хүн төрөлхтөн үүсэхээс 60 гаруй сая жилийн өмнө мөхөж олон мянган жилийн туршид байгальд хүний оролцоогүйгээр өөрөө чулуужих явцаар бүтээгдсэн өвөрмөц палентлогийн түүхэн үнэт олдвор гэдгийг нээлтийн үеэр мэргэжилтнүүд онцоллоо.
Нээлтийн үйл ажиллагааны үеэр Үлэг гүрвэлийн сор олдворын үзэсгэлэн, олдворын сонирхолтой лекц, Рой Чапмен Эндрюсийн судалгааны хөсөг, Тэмээн жингийн цуваа, Өсвөрийн палеонтологич хүүхдэд зориулсан үйл ажиллагаа, Үлэг гүрвэлийг амилуулсан 3d үзүүлбэр, кино, лазер шоу, үндэсний урлаг соёлын тоглолтууд зохион байгууллагдлаа.
ШУА-ийн дэд ерөнхийлөгч Г.Чулуунбаатар:
-Монгол Улсад анх удаагаа зохион байгуулагдаж байгаа Динозавр фестивалийн мэндийг та бүхэндээ хүргэхэд таатай байна. Энэ жил түүхэн жил тохиож байна. Учир нь Монгол Улсад палеонтологийн судалгаа хайгуул эхэлсэний 100 жил болж байгаа. Энэ түүхэн жилийг тэмдэглэн шинжлэх ухааныг түгээн дэлгэрүүлэх, шинжлэх ухаанч аялал жуулчлалыг хөгжүүлэх зорилгоор бид энэхүү 2 өдрийн урлаг соёл, шинжлэх ухаан хосолсон үйл ажиллагааг санаачлан зохион байгуулж байна. Үүнээс гадна Монгол Улсын палеонтологийн шинжлэх ухааны салбар нь дэлхийд үнэлэгддэг тэргүүлэх салбарын нэг болж байдаг. Тодруулбал дэлхийн топ 3 буюу эхний томоохон судалгааны салбарт манай Монгол Улсын палеонтологийн шинжлэх ухааны салбар багтдаг. Тиймээс БНХАУ, АНУ-ын дараа палеонтологийн шинжлэх ухааны үр дүнгээрээ манлайлж байгаад БШУЯ болон хувиасаа их талархалтай байна.
АНУ-ын Нью-Йорк хотын байгалийн түүхийн музейн судлаач Сүзен Голдбэрг:
-Миний бие 1999 оноос хойш ажиллаж буй Монгол Америкийн Голдбэрг-ийн хамтарсан ажлын багтаа маш их талархаж байгаагаа илэрхийлж байна. АНУ-ын байгалийн түүхийн музейн нэрийн өмнөөс 100 жилийн түүхэн үйл ажиллагаанд ирсэндээ бахархалтай байна. Манай байгалийн түүхийн музейд Монгол Улсын их говиос олдсон маш олон төрлийн үзвэрүүд байдаг. Энэ утгаараа Монголын палеонтологийн шинжлэх ухааны түүхэн ололтыг дэлхийд таниулж байгаа үйл хэрэг юм.
Япон улсын Элчин сайдын яамны нэгдүгээр нарийн бичгийн дарга Каяамо сан:
-Та бүхэндээ энэхүү түүхэн өдрийн мэндийг хүргэж байна. Үйл ажиллагаанд гэр бүлээрээ аялан ирж оролцож байгаадаа тун их баяртай байна. Энэхүү түүхэн арга хэмжээг санаачлан анхлан амжилттай зохион байгуулж байгаа Монгол Улсын палеонтологийн хүрээлэнгийн нийт хамт олноор бахархаж байна. Миний хувьд говь нутагт тодруулбал Баянзагт анх удаагаа ирж байна. Манай Токио хот цаг уурын хувьд их халуун ч Монголын говь илүү халуун уур амьсгалтай юм байна. Төсөөлснөөс их өөр байгааг мэдэрлээ. Тэгэхээр цаг уурын ийм их халуун орчинд олон сараар судалгаа шинжилгээг хийж байдаг судлаачдаар бахархлаа. Мөн тэр дундаа дэлхийд танигдсан Үлэг гүрвэлийн чухал олдворуудыг олсон бүс нутгийн хувьд миний хувьд их хүндэтгэлтэй байгаагаа илэрхийлж байна. Манай Япон улс Монгол Улстай палеонтологийн салбарт бараг 30 гаруй жилийн хамтын ажиллагааны түүхтэй. Тиймээс ч энэхүү арга хэмжээг зорин ирж оролцож байгаа. Та бүхэндээ баярлалаа.
МУ-ын ШУА-ийн Палеонтологийн хүрээлэнгийн захирал доктор, дэд профессор Х.Цогтбаатар:
-Монголын говьд анх удаагаа зохион байгуулагдаж байгаа олон улсын хэмжээний Динозавр фестивалийг зохион байгуулж ажиллаж байгаадаа маш их баяртай байна. Шинжлэх ухааны мэдлэгийг олон түмэнд таниулах гэдэг нь бидний хийх ёстой хамгийн чухал ажил мөн юм. Тиймээс манай хүрээлэнгийн эрдэмтэн судлаачид хамтран 2-3 жилийн өмнөөс бодож төлөвлөн богино хугацаанд зориглон зохион байгуулж байна. Үйл ажиллагаанд олон хүмүүс хамрагдаж байгаа нь их үр дүнтэй болж байгаа юм. Энэ үйл ажиллагаа уламжлал болон зохион байгуулагдана гэлээ.
Эх сурвалж: Монцамэ
