Жил бүр уламжлал болгон зохион байгуулдаг Залуу монгол судлаачдын зуны сургууль эхэллээ. 2023 оны Залуу монгол судлаачдын зуны сургуулийн нээлт БШУЯ-ны 401 тоот танхимд 2023 оны 7 дугаар сарын 31-ний 09.30 цагт болох гэж байна.

Анх 1989 онд "Залуу монголч эрдэмтний зуны сургууль" нэрээр зохион байгуулсан энэхүү сургууль хэсэг хугацаанд тасалдсаны эцэст, хэдэн жил өөр өөр байгууллага, олон янзын хэлбэрээр зохион байгуулж явсаар 2014 оноос эхлэн Монгол Судлалын Үндэсний Зөвлөл хариуцан зохион байгуулах болсон юм.

Зуны сургуулийн гол зорилго нь гадаадын залуу судлаачдыг Монгол орон, монгол ахуй, соёлтой танилцуулах, монгол хэл, соёлын амьд харилцааны орчинд монгол хэл, түүх, соёлын сургалт зохион байгуулахад оршино.

Ингэснээр хойч үеийн монголч эрдэмтдийг бэлтгэх, тэднийг Монгол Улсын эрдэмтэн судлаачидтай танилцуулан Монгол судлалын залгамж холбоог бэхжүүлэхэд бодит үр дүн гарах болно. 2023 оны Залуу монгол судлаачдын зуны сургуульд Оросын Холбооны Улс, Бүгд Найрамдах Хятад Ард Улс, Холбооны Бүгд Найрамдах Герман Улс, Япон улс, Бүгд Найрамдах Солонгос Улс, Бүгд Найрамдах Турк Улс зэрэг дэлхийн Монгол судлалын тэргүүлэгч улс орнуудын 13 их дээд сургууль, эрдэм шинжилгээний байгууллагын 30 шахам залуу монголч эрдэмтэн оролцож байна.

Энэ удаагийн Зуны сургуулийн ерөнхий зохион байгуулагчаар Монгол Улсын Боловсрол, Шинжлэх Ухааны Яам, Монгол Судлалын Үндэсний Зөвлөл, Залуу монголч судлаачдын “Эрдмийн хэлхээ” нийгэмлэг, хамтран зохион байгуулагч болон дэмжигчээр ШУА, МУИС, МУБИС, СУИС, Нүүдлийн соёл иргэншлийг судлах олон улсын хүрээлэн, Гандантэгчинлэн хийдийн Эрдэм соёлын хүрээлэн, Монголын Үндэсний номын сан, Монголын Үндэсний Музей, Чойжин ламын сүм музей, Улаанбаатар хотын музей зэрэг байгууллагууд ажиллаж байна.

Зуны сургуулийг монгол ахуй, монгол судлалын сургалт, эрдэм шинжилгээний байгууллагууд, музей, номын сан гэх зэрэг өөр өөр орчинд зохион байгуулна.

Гадаадын залуу монгол судлаачид малчны ахуй амьдралтай биечлэн танилцаж, нүүдлийн соёл иргэншлийн түүх, уламжлал, өнөөгийн байдалтай танилцах хичээлийг үзэхээс гадна монгол судлалын сургалт-эрдэм шинжилгээний гол төвүүдийн эрдэмтэн багш нарын лекцийг сонсох болно.

Энэ удаагийн Зуны сургуулийн онцлог нь Олон улсын монголч эрдэмтний XII их хурлын Залуу монгол судлаачдад зориулсан тусгай салбар хуралдаан зохион байгуулагдах гэж буй явдал бөгөөд дотоод, гадаадын залуу монгол судлаачид тус салбар хуралдаанд илтгэлээ хэлэлцүүлж, судалгаа шинжилгээнийхээ үр дүнгээс хуваалцан, үе тэнгийн эрдэмтэн залуустайгаа улам ойртон танилцах боломжтой болох юм.