Монгол Улсын 24 дэх аварга Пүрэвийн Бүрэнтөгсийн санаачилсан “Бүрэн Монгол гэр" төсөл 18 дахь аймагтаа хэрэгжиж байна. “Аваргын хишиг”-ийг хүртсэн 18 дахь айл бол Төв аймгийн Жаргалант сумын иргэн П.Төрбатынх. Тэр эхээс тавуул. П.Төрбат уул уурхайн компанид хөдөлмөрийн гараагаа эхлүүлэхдээ гагнуур хийхийг заалган ахлах болтлоо дэвшиж, одоо сумандаа энэ чиглэлээр хөдөлмөр эрхэлж байна. Нутгийн таньж мэдэх хүмүүстээ бол гагнуур хийхдээ үнэрхээд байхгүй.

Хийсэн ажлаа чанартай хийхийг эрмэлздэг гэж хэлэх энэ залуу дөлгөөн томоотой, бусдад тустай болохыг зэргэлдээх багийн иргэд ч хэлж байна.

Түүний ээж нутагтаа олон жил ногоо тарьж, өдгөө сумынхаа Соёлын төвд үйлчлэгчээр ажиллаж байгаа юм. Харин гэргий Б.Баяржаргал нь Хөвсгөл аймгийн Хатгал суманд төрж өссөн бөгөөд ханьтайгаа уул уурхайн компанид ажиллахдаа танилцаж, удаагүй гэр бүл болжээ. Б.Баяржаргал Жаргалант сумын Ерөнхий боловсролын сургуульд химийн багшаар ажиллаж байна. Хүүхэд багачуудад хими, биологи, эрүүл мэнд гэсэн чиглэлээр хичээл заахын зэрэгцээ ногоо тарих эрмэлзэлтэй байгаа гэв.

Орон нутгаас тэдний амьдрах эрмэлзэл, хүсэл зорийг үнэлэн дэмжих үүднээс гэр байрлах хашаа болон Орон нутгийг хөгжүүлэх сангийн зээлд хамруулахаа амласан нь энэ хөтөлбөр хүрээгээ тэлсэн, залуу хосуудад хүрсэн бодитой дэмжлэг гэлтэй. 

 

Энэ айл ааш зан сайтай, хөдөлмөрч болоод сумын иргэдийнхээ талархлыг хүлээсэн болохыг нутгийг удирдлагууд өгүүлж байна. Аваргын бэлэглэсэн гэрийг өнгөтэй өөдтэй авч явахаа залуу хосууд илэрхийллээ. Онцлох зүйл нь гардуулсан гэр зургаан ханатай, дээр нь иж бүрэн тавилгатай юм. Гэр олгоод зогссохгүй. Аварга орон нутгийн удирдлагуудад хүсэлт тавьж бусад талаар тус дэм болохыг хүсч, зарим төрийн байгууллагуудаас дэмжлэг үзүүлнэ гэнэ.

“Бүрэн монгол гэр" төслийн багийнхан нийгэмдээ тус дэм болсон, үлгэр жишээ, өв соёлыг түгээгч гэх зэрэг олон болзол шалгуур тавьсан бол орон нутаг дахь төслийн багийнхан гэр гардах айлыг шат шатны сонголтоос шалгаруулан авдаг байна.

Саяхан хүчтэй борооны улмаас тус сумын урд орших хиймэл нуурын далан нурах аюул үүсэхэд П.Төрбат далан бэхлэх ажилд ханцуй шамлан орсон байна. Шөнө, өдөргүй үзсээр байж эрсдэлийг тэр дор нь тогтоож чаджээ. Хэрэв энэ далан нурсан бол гарах эрсдэл нь хэмжих аргагүй их билээ.