"Залуучуудын Үндэсний Чуулган – 2023" төрийн ордонд зохион байгуулагдаж байна. Чуулганд залуучууд руу чиглэсэн үйл ажиллагаа явуулдаг иргэний нийгэм, төрийн бус байгууллага, клуб нэгдлүүд болон залуучууд оролцож буй юм. Энэхүү чуулганыг Монголын Залуучуудын Холбоо, Нийслэлийн Засаг даргын Тамгын газар, Опен клуб хамтран зохион байгуулж буй бөгөөд Монгол улсын хөгжлийн бодлого, үйл ажиллагаанд өөрсдийн санал санаачлагыг дэвшүүлэн нэгтгэж УИХ, Засгийн газар болон шийдвэр гаргах түвшинд залуусын дуу хоолойг зөвлөмж хэлбэрээр хүргэх зорилготой юм. Ийнхүү уншигч та бүхэнд залуучуудын чуулганы эргэн тойрон дахь мэдээллийг хүргэж байна.
О.Сэлэнгэ: Байгууллага бүр залуучуудад ээлтэй хөтөлбөр, төлөвлөгөөтэй байх нь чухал
Гэр бүл хүүхэд залуучуудын газрын Залуучуудын хөгжлийн газрын дарга О.Сэлэнгэ өнөөдрийн чуулганы талаар мэдээлэл өглөө.
Тэрбээр “Залуучуудыг дэмжих төвийн хууль хэрэгжээд таван жил болж байна. Энэ хууль хэрэгжсэний үр дүнд 21 аймагт Залуучуудын хөгжлийн төв байгуулаад 16 төвтэй байсан бол 43 төв болтлоо хөгжөөд явж байна.
Өнөөдрийн чуулга уулзалтад 21 аймаг, есөн дүүргийн залуучуудын дуу хоолойг сонсох, тэдний гаргасан санал санаачилгыг шийдвэр гаргах түвшинд хүргэх зорилгоор уг арга хэмжээг зохион байгуулж буйгаараа онцлог.
Мөн цахимаар болон бусад хэлбэрээр залуучуудын саналыг аваад, тулгамдсан асуудлыг төрийн захиргааны байгууллагууд хэрхэн шийдэх вэ, энэ асуудалд хэрхэн анхаарлаа хандуулах вэ гэдэгт ач холбогдол өгч уг хурал болж байна. Энэ хурал хэлэлцүүлгээс гадна панелист хэлэлцүүлэг гээд нийт таван хэсэг болон хуралдана. Бүх зүйлийг төр засаг шийддэг биш залуучууд өөрсдийн оролцоотойгоор тухайн орон нутгийн асуудлыг яаж шийдвэрлэх талаар энэхүү уулзалт хэлэлцүүлэг хийгдэж буй. Залуучуудад ээлтэй олон шийдвэрийг Засаг дарга нар гаргадаг. Тэр шийдвэрүүдийг бусад орон нутгуудад, улсын хэмжээнд яаж жишиг болгох вэ хэмээн залуучуудынхаа гаргасан санал санаачилгыг цаашид хэрэгжүүлэхээр зорьж байна. Зарим орон нутагт хүүхдийнх нь төрсөн өдрөөр цалинтай чөлөө олгож байна. Байгууллага бүр залуучуудад ээлтэй хөтөлбөр, төлөвлөгөөтэй байх нь чухал” гэв.
П.Нинжбадгар: Орон нутгаа зориод ирж буй залуучуудыг дэмжсэн бодлого алга
Завхан аймгийн хүүхэд залуучуудын газрын Залуучуудын хөгжлийн төвийн ахлах мэргэжилтэн П.Нинжбадгар орон нутгийн залуучуудыг төлөөлөн өөрийн байр сууриа илэрхийллээ.
Тэрбээр “Монголын залуучууддаа залуучуудын өдрийн мэндийг хүргэе. Завхан аймгаас таван төлөөлөл өнөөдрийн чуулганд оролцохоор ирсэн. Завхан аймгийн залуучуудад ямар асуудал тулгамдаж байгаа, залуучуудын чиглэлээр ямар ололт амжилттай ажлууд хийгдсэн талаар өөрсдийнхөө нөхцөл байдлыг бусад аймаг орон нутагт хуваалцах, цаашид төрийн ямар бодлого хэрэгжих талаар өөрсдийн санал бодлоо илэрхийлэхээр ирсэн. Завхан аймгийн төвд Залуучуудын хөгжлийн төв байдаг. Мөн Их-Уул сумд Залуучуудын хөгжлийн төвийг шинээр байгуулж чадсан. Энэ нь сум орон нутагт ажиллаж амьдрахаар зорьж ирж буй залуучуудад хамгийн хэрэгцээтэй зүйл байлаа. 21 аймагт залуучуудад тулгамддаг асуудал бол нийслэлийг орхиод орон нутгаа зориод ирж буй залуучуудыг дэмжсэн бодлого алга байна. Салбар зөвлөлүүд залуучуудыг дэмжих бодлого хөтөлбөр хэрэгжүүлж чадаж байна уу гэдэг бол хамгийн тулгамдаж буй асуудал. Бид 21 аймагтаа дэд хэлэлцүүлгүүдийг хийгээд залуучуудад тулгамдаж буй асуудлыг чуулган дамжуулахаар ирсэн” гэв.
Яна Зилкова: Залуу хүмүүст шийдвэр гаргах эрхийг нь өгөх хэрэгтэй
Каритас Чех Репаблик ТББ-ын Монгол дахь суурин төлөөлөгч Яна Зилкова сэтгэгдлээ хуваалцаа. Тэрбээр “Бид хүүхэд залуучуудын төлөө Европын холбооноос дийлэнх санхүүжилтийг нь гаргадаг залуучуудад чиглэсэн төсөл хөтөлбөрүүдийг хэрэгжүүлдэг. Өнөөдрийн энэхүү чуулганыг манай байгууллага хамтран зохион байгуулж байна. Монгол Улсыг залуучуудын улс гэдэг бол үнэн. Гэхдээ өнөөдөр бидэнд юу хэрэгтэй байна вэ гэвэл Монголын залуучуудын дуу хоолойг илүү сонсох, бодлого гаргахдаа залуучуудыгаа харж үзэх, залуучуудын үзэл бодлыг сонсох, залуучуудыг чадавхжуулах шаардлагатай байна. Залуучуудыг хяналт, бодлого, хуулиар зохицуулахаас илүү залуучуудын үзэл бодлыг илүү сонсож, тэднээр шийдвэр гаргуулах гарц шийдлийг олж өгөх хэрэгтэй. Залуу хүмүүст шийдвэр гаргах эрхийг нь өгөх хэрэгтэй гэж бодож байна” гэв.
Д.Батчулуун
