Орос, Монголын байгаль орчны байгууллагын мэргэжилтнүүд хамтарч аргалийн тооллого явуулжээ. Алтай, Саяны уулс болон хоёр улсын хилээр амьдардаг аргаль 2000 хүртэл өссөн дүнг гаргаад судлаачид баяртай байна.

Орос, Монголын байгаль орчны байгууллагын мэргэжилтнүүд хамтарч аргалийн тооллого явуулжээ.

Алтай, Саяны уулс болон хоёр улсын хилээр амьдардаг аргаль 2000 хүртэл өссөн дүнг гаргаад судлаачид баяртай байна.

Оросын талын шинжээчдийн ахлагч Сергей Спицин “Хүчтэй салхи, цасан шуургатайд ажиллахад хүндрэлтэй байсан. Гэхдээ Монголын газар нутагт цаг агаар тааламжтай байсан учраас тооллогоо амжилттай дуусгалаа” гэж хэвлэлийн мэдээнд дуржээ. Тэдний судалгаанаас оросын газар нутагт аргаль өссөн байгаа нь ажиглагдсан гэнэ.
Хоёр талын шинжээчид нийтдээ 1948 аргаль байгааг тогтоожээ. Эдгээрийн 1521 нь монголд, 427 нь оросын нутагт байгаа аж. 2003-2004 онд хийсэн тооллогоор 1000-1140 аргаль байсан юм. Харин 2010 оны тооллогоор 1700 орчим байсныг тогтоож байлаа.
Цаашид аргалийн амьдарч байгаа газар нутгийнн хамгаалалтыг сайжруулж хулгайн анг зогсоох шаардлагатайг мэргэжилтнүүд хэлж байна. Монголын нутагт аргаль агнахыг таслан зогсоох ажил тааруу байгааг оросууд шүүмжиллээ. Судалгааны багийнхныг хилийн бүсээс таван км зайд явж байхад нь хулгайгаар агнасан хэд хэдэн амьтан таарчээ. Хоёр янгирыг агнаад машинд ачиж явсан ул мөр үлдсэн байна. Энэ мэт асуудлыг газар дээр нь илрүүлж, байгаль хамгаалагчид сансрын холбоогоор шуурхай мэдээлэл дамжуулж байхыг судлаачид сануулж байна.