Элон Маскийн ойрын хамтрагч, мөн түүний дөрвөн хүүхдийн ээж гэгддэг Шивон Зилис АНУ-д үргэлжилж буй OpenAI-тай холбоотой дуулиант шүүх хуралд мэдүүлэг өгсөн талаар олон улсын хэвлэлүүд мэдээлжээ.
Калифорниа мужийн Оакланд хотын холбооны шүүхэд болсон хурлын үеэр Зилис өөрийгөө Маск болон OpenAI-ийн хооронд “нууц мэдээлэл дамжуулдаг хүн” байсан гэх мэдэгдлийг үгүйсгэсэн байна. Тэрбээр “Миний үнэнч байдал хиймэл оюун ухааныг хүн төрөлхтөнд ашигтай байлгахын төлөө байсан” хэмээн мэдүүлжээ.
Шүүх хурлын үеэр ил болсон баримтуудаас харахад, Маск 2018 онд OpenAI-ийг орхисныхоо дараа ч компанийн дотоод үйл ажиллагааны талаар мэдээлэл авах сонирхолтой хэвээр байсан аж. OpenAI-ийн өмгөөлөгчид Зилисийг Маскийн “дотоод холбоочин” байсан гэж буруутгаж байгаа юм.
Мөн Зилис шүүх дээр Масктай хувийн харилцаатай байсан тухайгаа нээлттэй ярьсан бөгөөд тэд IVF аргаар хүүхэдтэй болсон талаар дурдсан байна. Энэ нь өмнө нь олон нийтэд төдийлөн дэлгэгдээгүй хувийн мэдээлэл байжээ.
Уг хэрэг нь Маск OpenAI болон тус компанийн гүйцэтгэх захирал Сэм Алтман нарыг шүүхэд өгснөөс эхэлсэн юм. Маск OpenAI анх ашгийн бус байгууллага хэлбэрээр байгуулагдсан зорилгоосоо ухарч, ашиг олох бүтэц рүү шилжсэн гэж буруутгаж байгаа аж. Тэрбээр хэдэн арван тэрбум ам.долларын нөхөн төлбөр шаардаж байгаа талаар мэдээлжээ.
Шүүх хурлын үеэр танилцуулагдсан зарим зурвас, имэйлүүдээс үзэхэд Маск OpenAI-ийг Tesla компанитай нэгтгэх санал хүртэл гаргаж байсан байж болзошгүй талаар дурдагдсан байна. Технологийн салбарын хамгийн анхаарал татсан энэ шүүх ажиллагаа цаашид хиймэл оюун ухааны салбарын эрх мэдэл, хөрөнгө оруулалт, ёс зүйн асуудалд томоохон нөлөө үзүүлж магадгүй гэж ажиглагчид үзэж байна.
Л.Баяр
