Бэлгийн мөлжлөг, хүн худалдаалах гэмт хэрэгт буруутгагдаж байсан санхүүч агсан Жеффри Эпштейнд олон жилийн турш туслахаар ажилласан Лэсли Грофф АНУ-ын Төлөөлөгчдийн танхимын Хяналт, шинэчлэлийн хороонд хаалттай сонсголын үеэр мэдүүлэг өгчээ. Тэрбээр Эпштейний хууль бус үйл ажиллагааны талаар ажиллаж байх хугацаандаа огт мэдээгүй хэмээн мэдэгдсэн байна. 

Грофф 2001-2019 оны хооронд Эпштейний гүйцэтгэх туслахаар ажилласан бөгөөд түүний өдөр тутмын уулзалт, аялал, хуваарь зэрэг олон ажлыг зохион байгуулдаг байжээ. Гэсэн хэдий ч тэрбээр Конгрессын өмнө өгсөн мэдүүлэгтээ Эпштейнийг “гарамгай зальт этгээд”, “бусдыг төөрөгдүүлдэг хүн” байсан гэж тодорхойлж, өөрийн хууль бус үйлдлүүдийг ойр дотнын ажилтнуудаасаа хүртэл нууцалдаг байсан хэмээн мэдэгджээ.

Харин Конгрессын гишүүд болон хохирогчдын өмгөөлөгчид түүний мэдүүлэгт эргэлзэж байгаа юм. АНУ-ын Хууль зүйн яамны баримтуудад Грофф Эпштейний нэрийн өмнөөс тогтмол “массажны цаг” товлодог байсан бөгөөд зарим хохирогчид түүнийг уулзалтуудыг зохион байгуулж, мөнгө олгож байсан гэж мэдүүлсэн байдаг.

Грофф эдгээр асуудалд хариулахдаа “массаж товлох нь миний ажлын маш бага хэсэг байсан бөгөөд үүний цаана юу болж байгааг мэдээгүй” гэж тайлбарлажээ. Тэр мөн Эпштейний 2008 оны хэргийн талаар түүний ярьсан тайлбарт итгэж байсан бөгөөд өөрийг нь худал мэдээллээр төөрөгдүүлсэн гэж мэдэгдсэн байна.

Түүнчлэн Грофф өөрийгөө Эпштейний гэмт хэрэгт ямар нэгэн байдлаар оролцоогүй гэдгээ дахин онцолж, хэрэв үнэн мөнийг мэдсэн бол “хэзээ ч дуугүй суухгүй байсан” гэж хэлжээ. Тэрээр 2019 онд Эпштейнийг баривчилснаас хойш заналхийлэл, дарамт шахалт ихээр амссан тухайгаа мөн ярьсан байна. АНУ-ын Конгрессын Хяналтын хороо Эпштейний хэрэг болон түүнтэй холбоотой нөлөө бүхий хүмүүсийн талаар илүү дэлгэрэнгүй мэдээлэл цуглуулах зорилгоор мөрдөн шалгах ажиллагаагаа үргэлжлүүлж байгаа бөгөөд ойрын өдрүүдэд бусад гэрчүүдээс ч мэдүүлэг авахаар төлөвлөжээ.

Л.Баяр