Сүүлийн жилүүдэд төрийн бус өмчийн ерөнхий боловсролын сургуулийн тоо болон суралцагчдын эзлэх хувь өсөхийн зэрэгцээ сургалтын төлбөр жил бүр нэмэгдэх хандлага ажиглагдаж байгаа юм. Гэвч төлбөр нэмэгдүүлэх хугацаа, үндэслэл, мэдээлэх арга хэлбэр нь сургуулиудын хувьд харилцан адилгүй байгаа нь эцэг эх, асран хамгаалагчдад санхүүгийн дарамт учруулах, улмаар үл ойлголцол, маргаан үүсгэх нөхцөл болж байгааг салбарын яам онцолжээ.
Шинэ тушаалаар төрийн бус өмчийн сургуулиудын сургалтын төлбөр тогтоох, өөрчлөх үйл ажиллагааг илүү ил тод болгох, эцэг эх, асран хамгаалагчдад урьдчилан мэдээлэх, төлбөрийн зохицуулалтыг гэрээний үндсэн дээр хэрэгжүүлэх, суралцагчийн эрх ашгийг хамгаалах эрх зүйн орчныг бүрдүүлэхээр тусгасан байна.
Тухайлбал, сургалтын төлбөр болон нэмэлт үйлчилгээний хураамжид өөрчлөлт оруулах үндэслэл, тооцооллыг хичээлийн жил эхлэхээс өмнө танилцуулах, төлбөрийн талаарх шийдвэрийг мэдээллийн систем болон сургуулийн цахим хуудсаар дамжуулан нийтэд мэдээлэхээр зохицуулжээ. Мөн төлбөрийг хэсэгчлэн төлөх боломжийг гэрээгээр зохицуулах бөгөөд шинээр элсэгч болон үргэлжлүүлэн суралцах хүүхдийн суудал баталгаажуулах урьдчилгаа төлбөр нь сургалтын нийт төлбөрийн 10 хувиас хэтрэхгүй байх юм.
Түүнчлэн суралцагчийг элсүүлэх, шилжүүлэх, сургуулиас гарахтай холбоотой төлбөрийн нөхцөлийг гэрээнд тодорхой тусгах, сургалтын байгууллагын ажилтан, албан тушаалтан албан бус шинжтэй нэмэлт төлбөр, хандив шаардахыг хориглосон байна. Үүнээс гадна эцэг эх, асран хамгаалагчтай байгуулах гэрээний загварыг шинэчлэн боловсруулж батлах, хэрэгжилтэд хяналт тавих чиг үүргийг холбогдох байгууллагуудад даалгажээ.
Тушаал хэрэгжсэнээр сургалтын төлбөр болон бусад хураамжийн мэдээллийг тогтоосон хугацаанд нийтэд мэдээлэх, төлбөр нэмэгдүүлэх шийдвэрийн үндэслэл, зардлын бүтцийг ил тод танилцуулах нөхцөл бүрдэх юм. Мөн суралцагч сургууль шилжих болон сургуулиас гарах үед төлбөр буцаан олгох нөхцөл, журмыг тодорхой мөрдөж, эцэг эх, асран хамгаалагчдад мэдээлэл өгөх, санал авах ажиллагаа тогтмолжих аж.
Ингэснээр сургалтын төлбөртэй холбоотой маргаан, үл ойлголцол буурч, боловсролын үйлчилгээний ил тод байдал, байгууллагын хариуцлага сайжрахын зэрэгцээ эцэг эх, асран хамгаалагчид төлбөртэй холбоотой шийдвэрийг урьдчилан мэдэж, санхүүгээ төлөвлөх боломжтой болохыг Боловсролын яам мэдээллээ.
Тус тушаал нь хувийн сургуулиудын сургалтын төлбөр тогтоох эрхэд хязгаарлалт тогтоохгүй бөгөөд харин төлбөрийн талаарх мэдээллийг нээлттэй, ойлгомжтой хүргэх, суралцагч болон эцэг эхийн мэдээлэл авах эрхийг хангахад чиглэж байгаа юм.
