АНУ-ын Засгийн газар болон технологийн томоохон компаниуд өр зээлээ эрчимтэй нэмэгдүүлж байгаа нь дэлхийн бондын зах зээлд дарамт учруулж, улмаар хиймэл оюун ухаантай холбоотой хувьцааны ханшид эрсдэл бий болгож эхэлжээ. Дэлхийн бондын өгөөж сүүлийн өдрүүдэд огцом өсөж, АНУ, Их Британи, Японд олон жилийн дээд түвшинд хүрсэн байна. АНУ-ын 10 жилийн хугацаатай Төрийн сангийн бондын өгөөж лхагва гарагт 4.81 хувьд хүрч, 2023 оны сүүлээс хойших хамгийн өндөр түвшинд хүрчээ.

Шинжээчдийн үзэж байгаагаар үүнд инфляцын дарамт, Засгийн газрын өсөн нэмэгдэж буй өр, мөн Ойрх Дорнодын мөргөлдөөнөөс шалтгаалсан газрын тосны үнийн өсөлт нөлөөлж байна.

Гэхдээ энэ удаагийн бондын зах зээлийн дарамтад шинэ хүчин зүйл нэмэгдсэн нь хиймэл оюуны салбарын асар их хөрөнгө оруулалт юм. Google, Amazon, Meta зэрэг технологийн компаниуд дата төв болон AI дэд бүтцээ өргөжүүлэхийн тулд бонд гарган, энэ онд нийтдээ ойролцоогоор 220 тэрбум ам.долларын өр үүсгээд байна.

               АНУ-ын Засгийн газар ч их хэмжээний зээл авч байгаа энэ үед төр болон хувийн компаниуд хөрөнгө оруулагчдын мөнгөний төлөө өрсөлдөх болжээ. Үүний улмаас бондын үнэ буурч, өгөөж өсөх дарамт нэмэгдэж байна.

Бондын өгөөж өсөх нь технологийн компаниудад зээлийн зардлыг нэмэгдүүлэхээс гадна ирээдүйн ашгийг өнөөгийн үнээр тооцох үед хувьцааны үнэлгээг бууруулах эрсдэлтэй. Ялангуяа ирээдүйн өндөр өсөлтийн хүлээлтэд тулгуурласан AI компаниуд илүү ихээр өртөж болзошгүй байна.

Ийнхүү хиймэл оюуны салбар дэлхийн хөрөнгийн зах зээлийн өсөлтийн гол хөдөлгүүр хэвээр байгаа ч түүнийг санхүүжүүлэхэд шаардлагатай асар их хэмжээний өр нь эсрэгээрээ санхүүгийн зах зээлд шинэ эрсдэл үүсгэж эхэлж байна.

Л.Баяр