Хятадад нас барсан эмэгтэйчүүдийн цогцсыг худалдаж, “үхэгсдийн хурим” хийдэг баячуудын мода газар аваад байгаа тухай дэлхий даяар шуугиж байна. Бүх насаараа гоонь явсан эрчүүдийг нас барсан хойно нь хэн нэгэн эмэгтэйтэй гэр бүл болгож, хойд насанд нь үддэг мухар сүсэг Хятадад дэлгэрэв. Нас барсан эмэгтэйчүүдийн булшийг ухаж, шарилыг нь зардаг “бизнес” дэлгэрч байгаа нь цагдаа нарыг сандаргаад байгаа. Тэгвэл үүнээс арай өөр, хууль ёсны бизнес буюу хойчийн буян үйлддэг компаниуд асар их ашиг орлого олох болжээ. Энэ нь нэгдүгээрт хүн амын насжилт, хөгшрөлттэй холбоотой, хоёрдугаарт, иргэдийн амьжиргааны түвшин дээшилж, тансаг оршуулгад зарцуулах мөнгөтэй болсонтой холбоотой гэж “CNN” онцолсон байна.

  Хятад бол  дэлхийд хүн амын тоогоороо дээгүүрт ордог 1,4 тэрбум иргэнтэй. Үүний зэрэгцээ нас барагсдынхаа тоогоор ч толгой цохиж байна. 2012 онд жилд дунджаар 9,7 сая хүн үхэгсдийн ертөнцөд оддог гэсэн судалгаа байсан бол 2017 онд гэхэд жилд 10,4 сая хүн нас барна гэсэн таамаглал байна. Өөрөөр хэлбэл жилд Монголын хүн амаас гурав дахин олон хүн нөгөө ертөнцөд одож байна. Тиймээс ч олон  сая “үйлчлүүлэгч”-тэй оршуулгын ёслол хийдэг байгууллагуудын ашиг гэрлийн хурдаар өсч байгаа аж.

    Энэ бизнес /одоо industry хэмжээнд хүрсэн/ жилд 93,5 тэрбум юань буюу 15,4 тэрбум долларын орлого олжээ. Ирэх 5 жилд энэ ашиг 10 дахин өснө гэсэн тооцоог “Euromonitor” байгууллагаас гаргасан байна. Шанхайд төвтэй “Fu Shou Yuan” гэдэг хамгийн том буяны үйл ажиллагаа зохион байгуулдаг компанийн ашиг орлого жилийн өмнө Хон Конгт шинэ салбараа байгуулснаар 66 хувиар өссөн байна.

   Энэ бизнес цэцэглэхэд хойд насандаа хэрхэн амьдрах, ямар төрөлтөн болох нь ямар газар оршуулсан, ёс номоор нь үдэж чадсан зэргээс хамаарна гэх шашны ойлголт ихээхэн үүрэг гүйцэтгэж байна. Хятадууд бүрлээчийг одоход хоол, эд зүйлс, хуурамч мөнгөөс гадна Ipad, “Chanel”-ийн гоёмсог цүнх, үнэтэй тамхи хийдэг болсон тухай CNN-ийн сурвалжлагч бичжээ. Зарим баян гэр бүлүүд оршуулгын ёслолын үеэр чангаар эхэр татан уйлдаг “тусгай зочид”-ыг хөлсөлдөг болсон байна.

   Бээжинд булшны газар 78 мянган юань буюу 12 мянган доллар байдаг аж. Харин Хонконгт ийм газар олох хэцүү бөгөөд байнгын оршин суугч байсан иргэнд л арай хийж олддог байна. Зарим хүн оршуулгын газрын жагсаалтанд ороод зургаан жил хүлээх нь ч байдаг гэнэ. Хятадын хүн ам солигдох, эдийн засаг өсөхийн хэрээр энэ бизнес цэцэглэн хөгжиж байна. Засгийн газраас нь энгийн, үнэ өртөг багатай оршуулах ёслолыг хийхийг сануулсаар, хэвлэл мэдээллийн хэрэгслээр зөвлөсөөр байгаа ч баяжиж буй хятадууд хойд насандаа сайхан амьдрахын тулд их хэмжээний мөнгө зарцуулсаар байна.