Тайландын нийслэл Бангкок хотноо эсэргүүцэгчид гол замууд болон барилга байгууламжуудыг хааж эхэллээ. Харин Засгийн газраас эмх замбараагүй байдал үүсгэхгүйн тулд 18 мянган хамгаалалтын ажилтныг ажиллуулж байна. 2010 оны бослого хөдөлгөөний үеэр 90 хүн амиа алдсан түүх давтагдах вий гэхээс эрх баригчид эмээж байгаа юм.Жагсагчид өнгөрсөн 11-р сараас эхлэн ах Даксиныхаа төлөө ажиллаж буй ерөнхий сайд Инглак Шинаватраг огцрохыг шаардаж байгаа юм. Гэтэл Даксины нам орон нутгийн сонгогчдын дэмжлэгийг хүлээж, сүүлийн дөрвөн сонгуульд дараалан ялалт байгуулсан билээ. Тиймээс сөрөг хүчний намынхан ирэх хоёрдугаар сарын 2-нд болох дахин сонгуулийг эсэргүүцэж байна.
Өнгөрсөн оноос эхэлсэн Тайландын эсэргүүцлийн улмаас найман хүн нас барсан бөгөөд үл мэдэгдэх буутай этгээдүүд гал нээж, долоон хүнийг шархдуулсан юм. Одоо жагсагчид Бангкок хотын 150 орчим сургуулийг хаасан байна. Сөрөг хүчний удирдагч Судеп Тауксубан “Олон нийт ямар ч санал эсвэл хэлэлцээрийг хүлээж авахгүй” гэж мэдэгдлээ. Харин засгийн эрх баригчид эсэргүүцэгчдийн талтай сөргөлдөхгүйг хичээж буй ажээ. Тиймээс Инглак Шинаватра хамгаалалтын ажилтнуудыг жагсагчдын эсрэг зэвсэг хэрэглэхгүй байхыг анхаарууллаа. Өнгөрсөн оны сүүлээр эхэлсэн жагсаалыг дарахын тулд Инглак Шинаватра парламентаа огцруулж, дахин сонгууль явуулах товыг ирэх хоёрдугаар сард зарласан юм. Инглак дахин сонгууль явуулахаас нааш огцрохгүй гэдэг байр сууриндаа бат бөх зогсож байна.
