Орхон их сургуулийг үүсгэн байгуулагч ректор, Хэл шинжлэлийн ухааны доктор /Ph.D/, профессор Н.Хажидсүрэн энэ сарын 26-нд хүнд өвчний улмаас таалал төгсчээ.

Тэрээр 1953 оны 09 дүгээр сарын 25-ны өдөр Завхан аймгийн Сонгино сумын малчин ард Нямаагийн хоёр дахь охин болон мэндэлж,1963-1973 онуудад Сонгино сумын болон Улаанбаатар хотын 52 дугаар дунд сургуулийг алтан медальтай, 1979 онд ОХУ-ын Пятигорск хотын гадаад хэлний дээд сургуулийг англи, орос хэлний багш мэргэжлээр дүүргэжээ.

Н.Хажидсүрэн нь 1997 онд "Сурах бичиг зохиох дидактикийн асуудлууд" сэдвээр магисртын, 2000 онд хэл шинжлэлийн ухааны докторын зэрэг хамгаалсан бөгөөд 1992 оноос Орхон дээд сургуулийг үүсгэн байгуулж удирдахын зэрэгцээ улс төр, олон нийт хүмүүнлэгийн ажилд идэвхтэй оролцож ирсэн байна. Тухайлбал Ажил Олгогчдын Эздийн Холбооны гишүүн, МАН-ын бага хурлын гишүүн, Хан-Уул дүүргийн МАН-ын хорооны тэргүүлэгч, МАСЭХ-ны Удирдах зөвлөлийн гишүүн, Хан-Уул дүүргийн ИТХ-ын тэргүүлэгч гишүүн, НИТХ-ын төлөөлөгч зэрэг ажлыг  амжилттай гүйцэтгэж байсан төр нийгмийн зүтгэлтэн юм.