Жил гаруй хугацаанд 11 удаа хойшлогдон байж Шүүхийн шийдвэрээр МАН-ын эзэмшилд байсан В.И.Лениний музейн барилга  /хуучин нэрээр/ төрийн өмч мөн болох нь тогтоогдож, шүүхийн шийдвэр гүйцэтгэх журмын дагуу Нийслэлийн шүүхийн шийдвэр гүйцэтгэх алба 2014.05.07-ны өдөр  Нийслэлийн өмчлөлд хүлээлгэн өгсөн билээ.  

            Харин ТӨХ 2014.05.08-ны өдөр уг барилгыг Соёл, спорт, аялал жуулчлалын яамны харъяа Үлэг гүрвэлийн төв музейд эзэмшүүлэх шийдвэр гаргасан юм.

            Гэвч МАН-ын зүгээс энэ сарын 16-ны өдөр ТӨХ-гоор уламжлуулан  Соёл, спорт, аялал жуулчлалын яаманд албан бичиг  ирүүлсэн бөгөөд уг бичигтээ дээрх барилгад хийсэн хөрөнгө оруулалтыг хэрхэн шийдвэрлэх, MGLХХК-ийн оруулсан хөрөнгө оруулалтын үнэлгээг холбогдох байгууллагууд тогтоох хүртэл барилгад засварын ажил эхлүүлэхгүй байх  асуудлыг шийдвэрлүүлэхийг хүсээд байна.
 В.И.ЛЕНИНИЙ МУЗЕЙН /ХУУЧИН НЭРЭЭР/ ДОТОРХ БАЙДАЛ...

            ССАЖЯамны зүгээс В.И.Лениний музейд МХЕГ-аас улсын байцаагч томилон дүгнэлт гаргуулах талаар  албан бичгээр хандаад байгаа бөгөөд одоогоор албан ёсоор хариу ирүүлээгүй байгаа юм.

            Үлэг гүрвэлийн төв музейн хувьд засварын ажлыг яаралтай эхлүүлэн ирэх долдугаар сарын 11 гэхэд “Эцэг хүү Батаар учран золгов” хэмээх жижиг музейг нээхээр төлөвлөж байсан боловч ийнхүү МАН-ын зүгээс ирсэн уг хүсэлтийн улмаас засварын ажил хойшлов.
            Дашрамд өгүүлэхэд ТӨХ хороо болон ССАЖЯамны зүгээс өнгөрсөн жил уг барилгын эзэмшигчидтэй уулзахаар газар дээр нь очих үед аж ахуй нэгж, хувь хүмүүст түрээслүүлэн, түрээслэгчид үйл ажиллгаагаа хэвийн үргэлжүүлж байсан юм.

            Гэвч удалгүй MGLХХК нь дээрх барилгын өмчлөлийн асуудал хөндөгдөж эхлэх үеэр барилгын үндсэн хийцийг өөрчлөн засварын ажлыг эхлүүлсэн байгаа юм. Харин одоо ССАЖЯамнаас энэхүү барилгад оруулсан хөрөнгөө оруулалтыг шийдвэрлэж өгөхийг хүссэн нь музейн засварын ажлыг гацаасан явдал болоод байна.