С.Жанцан 1949 онд Ховд аймгийн Чандмань сумын нутагт төрсөн, 1968–1972 онд НАХЯ-ны Засан хүмүүжүүлэх байгууллагын барилгын ангид хянагч, 1972–1977 онд ОХУ-ын ДЯЯ-ны академид сонсогч, 1977–1982 онд НАХЯ-ны Цэргийн тусгай дунд сургуульд багш, 1982–1985 онд ОХУ-ын ДЯЯ-ны академид адъюнкт, 1985–1995 онд Цагдаагийн дээд сургуульд ахлах багш, тэнхмийн эрхлэгч, 1993-1999 онд Монгол Улсын Үндсэн Хуулийн цэцийн гишүүн, 1995–1998 онд БХИС-ийн Хилийн цэргийн дээд сургуульд тэнхмийн эрхлэгч, 1998–2003 онд Тагнуулын Ерөнхий Газрын Дээд сургуульд тэнхмийн эрхлэгч, 2003–2008 онд Цагдаагийн академид тэнхмийн эрхлэгч, 2008–2011 онд Цагдаагийн академид Криминологи судалгааны тасгийн эрхлэгч, зөвлөх профессор, 2011–2014 онд Дотоод хэргийн их сургууль, улмаар Хууль сахиулахын их сургуулийн Цагдаа судлалын төвийн дарга бөгөөд Эрдэм шинжилгээний тэргүүлэх ажилтнаар төрийн өндөр алба, хууль сахиулах байгууллага, их, дээд сургуульд тасралтгүй 46 дахь жилдээ ажиллаж иржээ.
Тэрээр хууль зүйн салбарын боловсон хүчнийг бэлтгэх, цагдаагийн алба хаагчдыг сургах, мэдлэг, мэргэжлийг нь дээшлүүлэхэд багана мэт түшиг тулгуур болж,  мянга мянган шавь нар, алба хаагчдын төлөө  билэг авьяасаа зориулж ирсэн манай ахмад шилдэг сурган хүмүүжүүлэгчдийн нэг байлаа.
С.Жанцан нь 1985 онд хууль зүйн ухааны дэд эрдэмтэн, 1992 онд хууль зүйн шинжлэх ухааны докторын зэргийг амжилттай хамгаалж, Шинжлэх Ухааны Академийн дэргэдэх Хууль зүйн шинжлэх ухаанаар докторын зэрэг хамгаалуулах зөвлөлийн гишүүн, Хууль сахиулах мэргэжлээр докторын зэрэг хамгаалуулах зөвлөлийн орлогч дарга, НҮБ-д зөвлөх эрхтэй Олон улсын Мэдээлэлжүүлэлтийн академийн Академич, Хууль сахиулахын их сургууль, Монголын Үндэсний их сургууль, Үндэсний Тагнуулын Академи, “Шихихутаг” хууль зүйн дээд сургуулийн магистрын зэрэг хамгаалуулах зөвлөлийн гишүүнээр ажиллаж, хууль зүйн салбарт тэр дундаа цагдаагийн байгууллагын үе үеийн  олон арван эрдэмтэн, судлаач, багш, алба хаагчдыг бэлтгэсэн тэргүүлэх зэргийн эрдэмтэн байв.
С.Жанцангийн шинжлэх ухаанд оруулсан хувь нэмэр, төрийн тусгай албанд зүтгэсэн хөдөлмөр бүтээлийг үнэлж 2009 онд Монгол Улсын Гавьяат хуульч цол хүртээжээ.
Түүнчлэн Цэргийн гавьяаны улаан тугийн, Цэргийн гавьяаны, Алтан гадас одонгууд, Цэргийн хүндэт болон ойн медалиуд, "Төрийн албаны тэргүүний ажилтан", Үндсэн Хуулийн Цэцийн “Хүндэт тэмдэг”, "Ардын боловсролын Тэргүүний ажилтан", "Шинжлэх ухааны тэргүүний ажилтан", "Онц сэргийлэгч", "Онц хилчин", "Хүндэт чекист", Шүүхийн шийдвэр биелүүлэх байгууллагын “Тэргүүний ажилтан", “Хүндэт ажилтан" цол, тэмдгээр тус тус шагнаж урамшуулсан байна.
 Талийгаачийн оюунлаг, хүнлэг энэрэнгүй, хөдөлмөрч,  хичээнгүй, үнэнч шударга, ноён нуруутай, зарчимч, эрхэм нандин зан чанар болон эгэл даруу, нөхөрсөг гэгээн дүр нь бидний сэтгэл зүрхэнд үеийн үед мөнхрөн үлдэх болно.
Талийгаачийн гэр бүл, үр хүүхэд, төрөл төрөгсдөд гүн эмгэнэл илэрхийлье.