ЗГХЭГ-аас орон нутагт зохион байгуулж байгаа “Баг-иргэний засаг захиргаа” хэлэлцүүлэг баруун бүсийн аймгуудад үргэлжилж байна. Төрийн байгууллагуудын дээд шатанд төвлөрсөн эрх мэдлийг сааруулж, үйл ажиллагааг нь ил тод болгосон хэд хэдэн үр дүнтэй ажил хэрэгжүүлснээ Улаангом хотод болсон хэлэлцүүлгийн үеэр Увс аймгийн удирдлагууд танилцууллаа.

“Шилэн халаас” хөтөлбөр хэрэгжүүлэн төсвийн зарцуулалтаа олон нийтээр байнга хянуулдаг болсноор төрийн хөрөнгө рүү уургын морь шиг дайрах хандлага буурч, өнгөрсөн онд гэхэд төрийн байгууллагууд нь зардлаа 1,2 тэрбум төгрөгөөр хэмнэсэн гэнэ. Шилэн дансны хуулийг УИХ хэлэлцэж батлахыг хүлээлгүй энэ сараас эхлэн Увсчууд төсвийн байгууллагуудынхаа бүх дансыг ард иргэддээ ил болгосон байна. Түүнчлэн, аймаг дэргэдээ аж ахуйтай байхыг халсан, орон нутгийн төсвөөр боссон объектуудыг хувьд шилжүүлж эхэлсэн нь “Том төрөөс ухаалаг төр лүү” санаачилгад нийцсэн реформын шинжтэй ажил болсон гэж аймгийн Засаг дарга Д.Цэндсүрэн хэллээ. Увсын хязгаарт өрнөж буй бүтээн байгуулалтын ажлуудад ч төрийн байгууллагуудын шууд оролцоог халж эхэлжээ. Барилга барих газрыг нь үнэгүй өгч, хувийн хэвшлээ бодлогоор дэмжсэнээр өнгөрсөн онд төсвөөсөө нэг ч төгрөг гаргалгүйгээр 168 айлын орон сууц ашиглалтад оруулсан, энэ жил тэр жишгээрээ 500 айлын орон сууц, 100 айлын хаус хороолол барина гэж аймгийн удирдлагууд тодотголоо. Иргэдээсээ өндөр үнэлгээ авсан өөр нэг ажил нь аймгийн Засаг даргаас эхлээд тамгын газрын удирдлагууд баг, сумын иргэдийн хуралд биечлэн оролцож, санал шүүмжийг нь сонсч байгаа явдал. Увсчууд энэ оныг төрийн үйлчилгээг айлын хаалгаар оруулах зорилтот жил болгож, цогц ажил эхлүүлсэн учир ийнхүү шат шатны нэгжүүдийнхээ асуудал бэрхшээлийг сонсч, шийдвэрлэж байгаа гэнэ. Төрийн үйлчилгээтэй холбоотой санал шүүмжийг иргэдээсээ тогтмол хүлээн авахын тулд Засгийн газрын “11 11 төв”-тэй адил чиг зорилготой “22 22 төв”, 22-22.мн сайт ажиллуулж байна.