Солонгос хоолны хачруудыг эрүүл ахуйн шаардлага хангахгүй нөхцөлд үйлдвэрлэдэг Хятад компанийн тухай бичлэг өнгөрсөн долоо хоногт олон нийтийн сүлжээгээр цацагдсан билээ.

Бичлэг дээрх үйлдвэрийг “Хүнь Шиян” гэх ба тэд 2008 оноос үйл ажиллагаа явуулж эхэлжээ.

Эх сурвалжийн мэдээлж буйгаар энэ сарын 5-нд буюу бичлэг цацагдахаас өмнө иргэдийн мэдээллээр БГД-ийн Мэргэжлийн хяналтын газраас  тус үйлдвэрт шалгалт явуулсан байна.

Шалгалтаар технологичгүй, хүнсний нэмэлтүүд нь баталгаагүй, гэрэлтүүлэг хангалтгүй зэрэг олон зөрчил илэрсэн бөгөөд тэдгээрийг үндэслэн торгож, зөрчлөө арилгах хугацаатай үүрэг өгчээ. Улмаар энэ сарын 23-нд дахин шалгалт явуулахад үүрэг даалгаварын биелэлт ердөө 30 хувьтай байсан гэнэ. Иймээс дүүргийн мэргэжлийн хяналтынхан зөрчлөө арилгаж дуустал тодорхойгүй хугацаагаар үйл ажиллагааг нь зогсоохоор шийдвэрлэсэн юм байна.

БГД-ын Мэргэжлийн хяналтаас ийнхүү үйлдвэрийг хаасан гэж байгаа. Гэтэл үйлдвэр одоог хэр нь нууцаар үйл ажиллагаа явуулсаар байна гэх мэдээлэл ч байгаа юм.