Эх, хүүхдийн эрүүл мэндийн үндэсний төв, Анагаахын шинжлэх ухааны үндэсний их сургууль. Монгол улсын их сургууль, АНУ-ын Өмнөд Калифорни мужийн Лос-Анжелесийн судлаачдын багийн хамтарсан “Эх, хүүхдийн эрүүл мэндэд агаарын бохирдлын үзүүлэх нөлөөлөл” сэдэвт олон улсын эрдэм шинжилгээний хурал боллоо. Хуралд Эрүүл мэндийн дэд сайд Ж. Амарсанаа, АНУ, бусад улсын Элчин сайдын төлөөлөгчид оролцож санаа бодлоо солилцсон юм. ДЭМБ-ын мэдээллээр дэлхийн хүн амын нийт өвчлөлийн 2.7 хувийг агаарын бохирдлын улмаас үүдэлтэй өвчин эмгэг эзэлж байна. Агаарын бохирдлын нөлөөгөөр дэлхийд жил бүр 1.6 сая хүн амьсгалын замын өвчнөөр нас бардаг байна. Дэлхийн банкнаас гаргасан тайланд Улаанбаатар хотын агаарын бохирдлын нөхцөл байдал, хүний эрүүл мэндэд үзүүлж буй сөрөг нөлөөллийн талаарх судалгааг танилцуулжээ. Энэхүү судалгаагаар нийслэлийн оршин суугчид РМ2.5 тоосонцорт өртөж буй жилийн дундаж хэмжээ Монгол улсын агаарын чанарын үндэсний стандартаас арав дахин, харин Дэлхийн эрүүл мэндийн байгууллагын хамгийн зөөлөн зорилтот шаардлагаас 6-7 дахин их гарсан байна. Мөн агаарын бохирдол нь дөнгөж төрсөн нярай болон бага насны хүүхдүүдэд муугаар нөлөөлж өвлөмтгий болгодог гэж эрдэмтэд хэллээ. Утаа нь хүүхдүүдийн өсөлтөд нөлөөлж монгол хүүхдийг давжаа, жижигхэн биетэй болгож буй үзэгдэл ч ихээр гарах болжээ.