“ЭЗЭН-100” буюу “Эдийн засгийг эрчимжүүлэх 100 хоног” ажлын хүрээнд Ерөнхий сайд Н.Алтанхуягийн дэргэд байгуулагдсан эдийн засгийн зөвлөлөөс мэдээлэл хийлээ.

“ЭЗЭН-100” хөтөлбөр гурав хоногийн дараа дуусна. Тиймээс өнгөрсөн өдрүүдэд эдийн засгийг эрчимжүүлэх чиглэлээр ямар ажлуудыг хийсэн талаараа өнөөдөр танилцуулж байгаа нь энэ аж. Өнгөрсөн хугацаанд Ерөнхий сайдын дэргэд байгуулагдсан тус зөвлөл нь  29 хуульд өөрчлөлт оруулахад хамтран ажилласан байна. Үүний нэг нь Ашигт малтмалын тухай хуульд өөрчлөлт оруулах хуулийн төсөл болон Газрын тухай хууль аж.

Мөн үндэсний хэмжээнд үйл ажиллагаа явуулдаг компаниудын төлөөлөлтэй уулзаж санаа бодлыг нь сонссон байна. Тиймээс тэдний саналыг Засгийн газрын шийдвэрт тусгахаар болжээ. Мөн томоохон бизнесийн уулзалтуудыг зохион байгуулж тэндээс эдийн засагт үр ашигтай төсөл хөтөлбөрүүдийг сонгон авч хэрэгжүүлэхээр болжээ.

Тус зөвлөлийн тэргүүн Б.Бямбасайхан энэ талаар хэлэхдээ “Манай зөвлөл байгуулагдсан цагаасаа хойш 20 гаруй илтгэлийг хэлэлцүүлж, санал, дүгнэлтээ хүргүүлсэн. Мөн 180 гаруй дотоодын болон гадаадын компанитай уулзсан. Засгийн газраас 29 хуульд нэмэлт өөрчлөлт оруулах саналыг оруулсан. Ашигт малтмалын шинэчилсэн найруулга, Газрын тосны тухай хууль батлагдсан байгаа. Эдгээр хуулиуд батлагдахад зөвлөлөөс санал хэлэлцүүлсэн. Өнгөрсөн онд Ерөнхийлөгч ухаалаг төрийг санаачилж эхлүүлсэн. Ухаалаг төрийн гол зүйл төр нь иргэн болоод бизнес эрхлэгчдийг сонсож шийдвэр гаргадаг байх. Татвар төлж байгаа хүн болон хурааж байгаа ажилтан хоёр хамтарч ажиллавал эдийн засгийн үр ашигтай шийдвэр гаргана гэсэн байдаг. Тиймээс эдийн засгийн зөвлөлийн үйл ажиллагаа цаашид үргэлжилж бизнес эрхлэгчидтэйгээ хамтарч ажиллана” гэв.

Мөн 100 хоногийн хүрээнд Хөрөнгө оруулалтын санг байгуулах ажлыг эхлүүлсэн байна. Олон улсын банк санхүүгийн байгууллагаас хөрөнгө татахаар ажилллаж байгаа аж. Түүнчлэн Япон, Монгол засгийн газрын хооронд хамтын ажиллагааны хэлэлцээр байгуулах тухай яригдаж байгаа. Оюутолгойн хоёр дахь шатны санхүүжилтын асуудлыг Засгийн газар болон бусад хөрөнгө оруулагчид хурдан шийдвэрлэх шаардлагатай байна гэв.

100 хоногийн хүрээнд эдийн засагт бодит гарсан үр дүн юу байна вэ. Валютын ханш өссөөр л байна. Хөрөнгө оруулалт зогсчихсон байдалтай байна. Эдийн засаг сайжрахгүй байна гэх хүмүүс байна гэсэн сэтгүүлчийн асуултад Б.Бямбасайхан хариулахдаа "5 дугаар сарын 13-нд анх хуралдахад өнөөдөр Монгол Улсад хөрөнгө оруулалтыг яаж нэмэгдүүлэх вэ, тэр тал дээр хэрхэн хамтарч ажиллах вэ, ямар, ямар арга хэмжээ зохион байгуулах уу, ямар төслүүдийг явуулах уу гэдэг зөвлөмж гаргая гэсэн саналыг хамгийн түрүүнд тавьсан. Тэр саналыг хүлээн зөвшөөрөөд хамтарч ажиллаж байна. Яг бодитой хэрэгжиж байгаа нь эрчим хүч, авто замын төслүүд байна. Гацаж байсан төслүүдийг эхлүүлсэн. Монголын компаниуд төслөө стандартын дагуу боловсруулаад очих юм бол хөрөнгө оруулагчид хөрөнгөө оруулж байгаа. Хууль эрхзүйн орчин, татварын орчинг илүү сайжруулах ёстой” гэлээ.