Манай улс 2004 оны 4-р сарын 26-нд НҮБ-ын Ази, Номхон далайн Нийгэм эдийн засгийн комиссын гишүүн орнуудын засгийн газар хоорондын хэлэлцээрт гарын үсэг зурж Азийн хурдны замын сүлжээнд нэгдэн орсон байдаг. Азийн хурдны замын сүлжээ нь Японоос Турк хүртэлх Азийг Европтой холбох 141,000 км урттай авто-замын нэгдсэн сүлжээ юм. Үүний AH3, AH32 болон AH4 гэсэн замуудыг Монгол Улс өөрийн нутагтаа барьж байгуулах үүрэг хүлээсэн байдаг.

Тиймээс “Алтанбулаг-Улаанбаатар-Замын-Үүд” чиглэлийн хурдны авто-замыг барьж байгуулахаар “Чингис Лэнд Девелопмент Групп-Шинэ хөгжлийн зам” олон улсын түншлэл Монгол Улсын хөгжлийн түүхэн дэх биет бүтээн байгуулалтын энэхүү аугаа төслийг үе шаттайгаар хэрэгжүүлж эхэлсэн юм. 
Барих-Ашиглах-Шилжүүлэх нөхцөлтэй концессын гэрээгээр “Алтанбулаг-Улаанбаатар-Замын-Үүд”-ийг холбосон 1000 гаруй км хурдны авто-замыг 2-3 жилийн дотор өөрийн хөрөнгө оруулалтаар барьж байгуулан, 30 жилийн дараа төрийн мэдэлд үнэ төлбөргүй шилжүүлэх ажээ. Ийнхүү томоохон бүтээн байгуулалтыг улсын төсөвт ямар нэгэн ачаалал өгөхгүй концессын гэрээгээр хувийн хэвшил хэрэгжүүлэх анхны том алхам эхэллээ.

Мөн концесс эзэмшигч нь гэрээг үзэглэснээс хойш 9 сарын хугацаанд нарийвчилсан техник эдийн засгийн үндэслэл зураг төслийг боловсруулах, төслийн санхүүжилтийн гэрээг байгуулан эхний ээлжийн үйл ажиллагааг санхүүжүүлэх хөрөнгийг Монгол Улсын аль нэг арилжааны банкинд байршуулсан байх зэрэг үүрэг хүлээсэн ажээ. ОХУ-ын Ерөнхийлөгч В.В. Путины айлчлалын үед буюу 9-р сарын 3-ны өдөр Концесс эзэмшигч нь дээрх үүргүүдээ 5 сарын дотор буюу хугацаанаас нь өмнө бүрэн биелүүлснээ Засгийн газраар дүгнүүлэн 9-р сарын 9-ны өдөр шав тавих нээлтийн ёслолоо хийхээр ажиллаж байна.
Улмаар “Чингис Лэнд Девелопмент Групп – Шинэ хөгжлийн Зам” олон улсын түншлэл энэхүү бүтээн байгуулалтын ажлаа төлөвлөгөөт хугацаанд нь хийж гүйцэтгэхийн тулд намар өвлийн улиралд ч тасралтгүй ажиллахаар төлөвлөж байгаа юм байна. Энэхүү Монгол орны нийгэм эдийн засгийн хөгжлийг шинэ шатанд гаргах бүтээн байгуулалтын төслийн барилга угсралтын ажилд ойролцоогоор үндэсний 1000 гаруй, гадаадын 30 орчим аж ахуйн нэгж оролцохоор тооцоолж байгаа юм байна. Мөн нийт 30,000-40,000 байнгын болон түр ажлын байр шинээр бий болохоос гадна хурдны авто-замыг дагаад шинэ хот суурин, тээвэр ложистикийн болон бусад үйлдвэр, үйлчилгээний шинэ төвүүд бий болно.

Ийнхүү Монгол Улсын санаачлагаар ОХУ, БНХАУ-ын дээд хэмжээний уулзалтуудын үер яригдаж байгаа “Талын зам” дэд бүтцийн бүтээн байгуулалтын төслүүд бодит ажил болж, хэрэгжиж эхлэх цаг ирлээ.