НҮБ-ын Цөлжилттэй тэмцэх конвенцын Талуудын 17 дугаар бага хурал /COP17/ Улаанбаатар хотноо гурав дахь өдрөө үргэлжилж байна.

Өнөөдөр ХХААХҮ-ийн салбарын хүрээнд “Тал нутгаас зах зээлд: Монголын бэлчээрийн нүүрстөрөгчийн боломж” сэдэвт хэлэлцүүлэг амжилттай зохион байгуулагдлаа.

Хэлэлцүүлгийг Yolda Initiative болон AMNC-ийн Гүйцэтгэх захирал, доктор Энгин Йылмаз удирдан явуулсан бөгөөд ХХААХҮЯ-ны Мал аж ахуй, генетик нөөцийн хэрэгжилтийг зохицуулах газрын дарга, доктор Л.Чой-Иш, Япон Улсын Мицубиши корпорацын Эрчим хүч, эрчим хүчний системийн группийн менежер Такэхиро Ямамото нар илтгэл хэлэлцүүлэв.

Хэлэлцүүлгийг эхэнд ХХААХҮЯ-ны Төрийн нарийн бичгийн дарга Т.Жамбалцэрэн үг хэлэв.

Тэрбээр Монгол Улсын бэлчээрийн менежментийг шинээр хөгжиж буй нүүрстөрөгчийн зах зээлтэй уялдуулах, тогтвортой, эрүүл хүнсний үйлдвэрлэлийг олон улсын худалдаанд нэвтрүүлэх, хөдөө аж ахуйн хөгжлийг дэмжих “Нутагтаа эзэн-100:1000” төсөл, Монгол Улсын Ерөнхий сайдын санаачилсан “Нарлаг Монголын Малчин” хөтөлбөр зэрэг онцлог, шинэлэг санаачилгыг танилцуулж, олон улсын хамтын ажиллагааг өргөжүүлэх боломжийн талаар онцоллоо.

Монгол Улс НҮБ-ын Цөлжилттэй тэмцэх конвенцын Талуудын 17 дугаар бага хурлыг зохион байгуулахаас хэдхэн долоо хоногийн өмнө буюу 2026 оны долоодугаар сарын 2-ны өдөр “Уур амьсгалын өөрчлөлтийн тухай” анхдагч хуулийг баталсан.
Энэхүү хуулиар Монгол Улсад нүүрстөрөгчийн зах зээлийн эрх зүйн суурь зохицуулалтыг бүрдүүлж, бэлчээрийг ой, сав газрын нэгэн адил хүлэмжийн хийг шингээж, хадгалдаг экосистем болохыг эрх зүйн хүрээнд хүлээн зөвшөөрсөн.

Хүнс, хөдөө аж ахуй, хөнгөн үйлдвэрийн яам нь эрхлэх асуудлынхаа хүрээнд малчид, иргэдийн орон нутагтаа ая тухтай, тогтвортой амьдрах нөхцөлийг бүрдүүлэхэд чиглэсэн шинэ технологи, инновац, зах зээлийн боломжийг нэвтрүүлэх, ашиглахыг тууштай зорьж байна.

Өөрөөр хэлбэл, дэлхий дахинд бий болж буй шинэ боломжийг соргогоор ашиглан хүнс, хөдөө аж ахуй, хөнгөн үйлдвэрийн салбарын тогтвортой хөгжлийг хангах үндсэн зорилтоо хэрэгжүүлэхийн зэрэгцээ олон улсын байгууллага, улс орнуудтай энх тайванч, эрх тэгш, харилцан ашигтай хамтын ажиллагааг өргөжүүлэн хөгжүүлэх болно гэдгийг Төрийн нарийн бичгийн дарга Т.Жамбалцэрэн онцоллоо.

Мөн Монгол Улсын Ерөнхий сайдын санаачилсан “Нарлаг Монголын малчин” хөтөлбөрийн хүрээнд хөдөө аж ахуйн эдэлбэр газрын нөөц, боломжид түшиглэсэн бизнесийн үйл ажиллагааг дэмжиж, уламжлалт бэлчээрийн мал аж ахуй, хөдөө аж ахуйн үйлдвэрлэлийг орчин үеийн дэвшилтэт арга барил, техник, технологитой хослуулан хөгжүүлэх замаар эдийн засаг, байгаль орчин, нийгмийн үр өгөөжийг нэмэгдүүлэх чиглэлээр ажиллаж байгааг онцлов.