Улаанбаатар хотын Захирагчийн ажлын алба, АНУ-ын Азийн сан, БЗД-ийн Засаг даргын Тамгын газар, 27-р хорооны Засаг дарга, хэсгийн ахлагч, иргэдийн бүлэг хамтран “Хоггүй  орчин -Эрүүл ирээдүйн төлөө” төсөл хэрэгжүүлж өнөөдөр нээлтээ хийлээ. Төслийн хүрээнд “Нийтийн үйлчилгээний Улаанбаатар нэгтгэл”-ээс 30 машин гаргаж БЗД-ийн 27-р хорооны Сэлбийн 24-р гудамжны замыг зассан. Энэхүү гудамж нь намаг бүхий шаварлаг хөрстэй байсныг хуулж, 600 м урт, 7 м өргөн,  3 м хүртэлх гүнзгий хайрга асган нягтаршуулан тэгшилж шороон зам болгон зассан. Ингэснээр ус шалбааг тогтсон энхэл донхолтой замаар иргэд усны гутал өмсөн явах хүндрэлгүй болж,  түргэн тусламж гал команд, хог тээвэрлэлтийн үйлчилгээ авах боломжийг бүрдүүлжээ. Тус хорооны 46 айл өрх хашаагаа татаж, нийтийн эзэмшлийн талбай бий болгон хогийн цэг байсан газрыг цэвэрлэн цемэнтлэн сагсны шийд байрлуулж, хүүхэд, ахмад настанууд чөлөөт цагаа өнгөрүүлэх тоглоомын талбайтай болсон. Эдгээр ажилд тус гудамжны иргэд гар бие оролцон хамтран ажилласан. Энэхүү тохижилтыг хараад бусад гудамжны иргэд ч санал санаачлага гарган орчноо тохижуулж эхэлсэн байна. Төсөл хэрэгжсэн гудамжинд  хог тээврийн үйлчилгээний  нэгдсэн хуваарьтай болж, тэвш тавих  зориулалтын 4 талбайг бэлтгэн,  хоёрдогч түүхий эдээ хийх 5 хогийн сав байрлуулсан. Удахгүй БЗД-ээс тус гудамжинд бүрэн гэрэлтүүлэг хийж, явган хүний зам тавина. Энэ үеэр төсөл хэрэгжүүлсэн иргэд нээлтийн туузаа хайчлан, хүүхдүүд нь төрийн дуулал дуулж, хамтран ажилласан байгууллагууддаа талархлаа илэрхийллээ.

2014 он гарсаар Улаанбаатар хотын Захирагчийн ажлын алба гэр хорооллын амьдрах орчныг сайжруулахаар иргэдийн оролцоог хангасан 8 төсөл, АНУ-ын Азийн сангаас санхүүжүүлэн    “Загвар хороо”-ны 10 төслийг гэр хороололд хэрэгжүүлж байна.