Монгол орны намар баян тансагийн илэрхийлэл байдаг. Үр тариа, ногоо цагаа, хадлан тэжээлээ энэ л цагт хурааж, таван хошуу малын тарга тэвээрэг гүйцдэг налгар сайхан улирал. Айрагтай, найртай, басхүү өвлийн бэлтгэлийн их ажил ундарч үүцээ базаадаг, оросоор бол “Бархатный сезон” гэгдэх энэ цаг дор хөрш хоёр орны Төрийн тэргүүн Монгол Улсад шил даран айлчилж байна. Хэнийг ч ирсэн ялгалгүй  алд цэнхэр хадгаа дэлгэж, сэвгүй сэтгэлийн илэрхийлэл болсон цагаан сүүгээ бялхуулж угтдаг монголчууд хөршүүдийнхээ тэргүүнүүдтэй ч тэгж л найр тавин золгож буй.

    Дэлхийн орон, гүрнүүдтэй найрсаг, энхийн харилцаатай Монгол Улсад гаднын айлчны хөл тасардаггүй ч хоёр хөршийн Төрийн тэргүүн нар нэгэн дор шахам Улаанбаатарт хүрэлцэн ирж байсан тохиол өмнө нь үгүй. Гэтэл сайны хажуугаар саар гэгчээр үүнийг харлуулах гэсэн хэн нэгний “нясалсан” чулуу “К событиям в Монголии”  гэсэн гарчигтайгаар http://ivanovic1963.livejournal.com/564.html  хаягаар олон нийтийн цахим сүлжээгээр тарж, монгол хэл дээр ч цацагдаж эхэлжээ.

    Уг бичвэрт дурдсанаар Монголд яг одоо Украинд болж буй шиг үйл явдал  давтагдаж магадгүй талаар хүчтэй яригдаж байна гэнэ. “Баримт нь ч илхэн” хэмээн бичигч “нотолжээ”. Түүний бичсэнээр Монгол Улсын Ерөнхийлөгч тэргүүтэй АНУ-д бэлтгэгдсэн 12 улстөрч Монголд бий аж. Мөн өнөөгийн Ерөнхийлөгч Ц.Элбэгдорж төрд ямар нэгэн албан тушаалгүй, Ардчилсан намын дарга байсан үедээ автын осолд ороход нь Америкийн цэргийн онгоцоор Гуам арал дээрх цэргийн баазад яаралтай аваачин эмчилж байсан гэжээ. Бас Монгол Улсын Ерөнхийлөгчийн саяхан Японд хийсэн айлчлалыг “гэнэтийн”  хэмээн тодотгоод, Украинд болж байгаа үйл явдалтай холбоотойгоор Америкийн гадаад бодлого идэвхжиж байгаа болон хөрш хоёр орны Төрийн тэргүүдийн Монголд хийх айлчлалтай үүнийг холбон тайлбарласан байна. Монгол Улсын Ерөнхийлөгчийн Японд саяхан хийсэн айлчлалыг өмнө нь огт авч үзэж төлөвлөөгүй нь Ц.Элбэгдоржтой Японы талын нэг ч өндөр албаны хүн уулзаагүйгээр нотлогдож байна хэмээгээд Ерөнхийлөгчийн Тамгын газрынхан уг айлчлалыг Японы худалдааны нэгэн танхимын урилгаар санд мэнд зохион байгуулсан гэж гүжирджээ. Монгол Улсын Ерөнхийлөгчийн Японд хийсэн айлчлалын зардлыг Америкийн тал төлсөн гэж мөн бичсэн байна. “Гурав дахь хөршийн бодлогын эсрэг дуу хоолой улам бүр сонсогдох боллоо. Юуны өмнө хоёр хөрштэйгээ харилцаагаа төвхнүүлмээр юм даа” хэмээн “К событиям в Монголии”  гэсэн гарчигтай зүйлд бичжээ.

    Эдгээр үйл явдал үнэн хэрэгтээ хэрхэн өрнөснийг эргэн сөхье. Монгол Улсын Ерөнхийлөгч Ц.Элбэгдорж Ардчилсан намын дарга байхдаа 2007 онд автын осолд орсон нь үнэн. Гэхдээ Монголдоо Гэмтэл согог сэргээн засах үндэсний төвийн Тархины эрчимт эмчилгээний тасагт хэвтүүлэн эмчлүүлж байгаад БНСУ-д үргэлжлүүлэн эмчилгээ хийлгэснээс биш огтхон ч Америкийн Гуам арал дээрх цэргийн баазад очоогүйг монгол хүн бүр мэднэ.

    Японд хийсэн айлчлалын тухайд Японы Ерөнхий сайд Ш.Абэ 2013 оны гуравдугаар сард Монголд айлчилсан үеэс, түүнээс ч бүр өмнө Ерөнхийлөгч Ц.Элбэгдоржийн айлчлалын талаар яригдаж байснаар барахгүй Монгол, Японы хооронд янз бүрийн түвшний харилцан айлчлал тасралтгүй болж ирсэн юм.

    Монгол Улсын Ерөнхийлөгч Ц.Элбэгдорж  өнгөрсөн долдугаар сард Японд ажлын айлчлал хийхдээ Японы Ерөнхий сайд Шинзо Абэтэй албан ёсны хэлэлцээ хийж, хамтарсан мэдэгдэлд гарын үсэг зурснаас өгсүүлээд албаны олон хүнтэй уулзаж, чухал ажлууд хийснийг зурагдсан, баталгаажсан баримт бичгүүд бэлээхэн нотолно. Монгол Улс хөрш хоёр оронтойгоо харилцаа, хамтын ажиллагаагаа улам бэхжүүлж, бусад оронтой гурав дахь хөршийн бодлогоор найрсаг харилцсаар ирсэн, дотоодын зөрчлөө хэнээр ч заалгалгүй дотроо ярилцан зохицуулж чаддаг бүрэн эрхт орон.

    Өөрт хамаагүй, үнэн түүхийг нь мэдэхгүй зүйлээр саваагүйрхэн оролдож дэмий ярихыг монголчууд “Саваагүй нохой саранд хуцна” хэмээн ёгтолдог билээ.