МАХН-ын дэргэдэх Ардчилал Шудараг ёс, Монголын залуучуудын холбооноос залуучуудын дунд улсын чанартай спорт өдөрлөг зохион байгуулжээ. Өдөрлөгийн талаар Ерөнхий нарийн бичгийн дарга С.Тэмүүлэнтэй ярилцлаа.

-Танай холбооноос спортын өдөрлөг зохион байгуулжээ. Өдөрлөгийн талаар яриагаа эхлэх үү?

- Ардчилал, Шударга ёс, Монголын Залуучуудын холбооноос өнгөрсөн амралтын өдрүүдэд Онцгой Байдлын Ерөнхий газрын спорт зааланд  “Спортын өдөрлөг” зохион байгууллаа. Өдөрлөгт нийт найман дүүрэг, таван аймаг, мөн намын дэргэдэх Оюутны холбооны тамирчид оролцлоо. Нийгмийн хамгийн идэвхтэй бүтээлч хэсэг бол залуус. Тэр утгаараа залуучуудын оролцоо, тэдний эв нэгдэл нь нийгэмд чухал нөлөөтэй байдаг. Тиймээс бид залуучуудыг нөхөрсөг тэмцээн уралдаанаар дамжуулан нийгмийн идэвхийг нь сэргээх, амралт чөлөөт цагийг нь зүй зохистой өнгөрөөхийг зорьсон. Манай АШЁЗХ нь өөрөө нийгэмд шударга ёсыг бий болгохыг эрмэлздэгийн хувьд залуусдаа энэ мессежийг эл спорт өдөрлөгөөр дамжуулан өгөх байсан.

-Өдөрлөгт оролцогсод спортын ямар төрлөөр оролцсон бэ?

-Спортын өдөрлөг Теннис, шатар, сагсан бөмбөг гэсэн үндсэн гурван төрөлд болж өнгөрлөө. Манай холбоо спортын өдөрлөгийг жил бүр уламжлал болгон зохион байгуулахаар төлөвлөөд байгаа. Цаашдаа зөвхөн намын гишүүд дэмжигчид ч биш, нийт залуучуудыгаа хамруулж өргөн цар хүрээтэйгээр зохион байгуулахыг зорьж байна. Залуучуудын хандлага нь өөрөө цаг заваа спортлог, зөв боловсон өнгөрүүлэх болоод байгаа шүү дээ. Нэг хэсэг болохгүй бүтэхгүй болгоныг залуучуудтай холбож тайлбарладаг, шүүмжилдэг хандлага байсан бол өнөөдөр тэр ойлголт үндсээрээ үгүй болж манай залуус спортлог болж, эрүүл аж төрөх ёсыг эрхэмлэдэг болсон байна. Тиймээс тэмцээн, өдөрлөгт ч гэсэн идэвхитэй оролцдог болсон.

-Спорт өдөрлөгт ямар баг тамирчид тэргүүлэв?

-Шатрын тэмцээний эрэгтэйчүүдийн төрөлд Сүхбаатар дүүргээс оролцсон баг алтан медаль авч Чингэлтэй дүүрэг мөнгөн медаль, мөн Сүхбаатар дүүрэг хүрэл медаль хүртсэн. Харин  эмэгтэй төрөлд Оюутны холбоо алтан медаль авч, Сүхбаатар дүүрэг болон Баянгол дүүргүүд удаалсан байна. Ширээний теннисний эрэгтэйчүүдийн төрөлд Оюутны холбоо алтан медаль авч, Сүхбаатар дүүрэг болон Баянгол дүүргүүд мөнгө, хүрэл медаль авсан бол эмэгтэйчүүдийн төрөлд Өмнөговь аймаг алтан медаль хүртэж, Багахангай болон Төв аймаг мөнгө, хүрэл медаль хүртсэн. Спортын төрлийн багийн спорт болох Сагсан бөмбөгийн тэмцээнд эрэгтэй багаас Нийслэлийн Налайх дүүрэг түрүүлж, Төв аймгийн баг мөнгөн медаль, Сэлэнгэ аймаг хүрэл медаль хүртсэн. Харин эмэгтэй багаас Нийслэлийн Баянгол дүүрэг түрүүлж, Сүхбаатар дүүрэг мөнгө, Төв аймгийн баг хүрэл медаль хүртэж тэмцээнийг амжилттайгаар өндөрлөлөө. Мөн “Шилдэг баг”-аар Сүхбаатар дүүрэг тэргүүлж шилжин явах цомын эзэн болсон.

-Танай холбоо нийгэм рүү, залуучууд руу чиглэсэн идэвхитэй үйл ажиллагаа зохион байгуулдаг. Тэр хэрээр гишүүнчлэлийн хувьд идэвхитэй байдаг болов уу?

-Тэр үнэн. Ер нь МАХН-ын дэргэдэх залуучууд, оюутнууд, ахмад, эмэгтэйчүүд гээд холбоодууд маань идэвхитэй  ажилладаг. Тэр утгаараа шинээр гишүүн болж элсэх хүсэлт байнга ирдэг. Өдөр бүр шинэ гишүүн элсүүлэн авдаг гэхэд болно. Хамгийн гол нь залуучуудын нийгмийн идэвхи тэр хэрээрээ өндөр болж байна гэж ойлгож болно. Зүгээр суугаад харах биш. Өөрсдөө гар бие оролцож, нийгмийг, улс эх орноо өөд татахыг чухалчилдаг болж. Ийм идэвхитэй хүмүүсийг бид дэмжиж ажиллах нь зүйн хэрэг.