Агаарын хэм хасах руу шилжиж барилгын цутгалтын ажил зогссон ч дотоод засал үргэлжилж байгаа учир хөдөлмөрийн аюулгүй байдлыг хангуулах чиглэлээр анхаарахыг Мэргэжлийн хяналтын ерөнхий газрын дарга Д.Батмөнх холбогдох хяналтын газрууд, Нийслэлийн Мэргэжлийн хяналтын газарт үүрэг болголоо.

2014 оны 11 дүгээр сарын 24-ний өдөр болсон шуурхай хурлаас ийм шийдвэр гаргалаа.

Нийслэлийн Мэргэжлийн хяналтын газар өнгөрсөн долоо хоногт барилгын салбарт үйл ажиллагаа явуулдаг бүх аж ахуйн нэгжийг цутгалтын ажлаа зогсоох шаардлага хүргүүлсэн. Шаардлага хэрэгжиж байгаа эсэхийг энэ долоо хоногт шалгах бөгөөд барьж байгаа барилга бүрт ослоос урьдчилан сэргийлэх зөвлөмж хүргүүлж эхэлжээ.

Ирэх 14 хоногт хяналтын газрууд ирэх онд яамд, төрийн болон төрийн бус байгууллагуудтай хамтран хийх эрсдэлд суурилсан хяналт шалгалтын саналаа ирүүлэх, 2015 оны үйл ажиллагааны стратегийн зорилтоо тодорхойлж, хэрэгжүүлэх арга хэмжээ, хүрэх үр дүнг хэмжих шалгуур үзүүлэлт боловсруулах, улсын байцаагчийн эрх авч ажиллаж байгаа байцаагчдын ажлыг дүгнэх, орон нутгийн, төсвийн хөрөнгө оруулалтаар хилийн боомтод байгуулах боломжтой барилга, байгууламжийн жагсаалтыг боомт тус бүрээр гаргахаар тогтов.

Монгол Улсын Шадар сайдын тушаалаар Мэргэжлийн хяналтын байгуллагын бүтцийг баталсан тул хяналтын газар, хэлтсийн дарга, улсын ахлах байцаагчдын ажлын байрны тодорхойлолт, орон тоог шинэчлэн батлуулах, байцаагчдын нэршлийг шинээр мөрдөгдөж байгаа хууль тогтоомжид нийцүүлэх, Ашиг сонирхолын зөрчлөөс урьдчилан сэргийлэх үүднээс хариуцсан чиглэлээрээ 10-аас дээш жил нэг газар, хэлтэст ажилласан байцаагчдыг сэлгүүлэн ажиллуулах боллоо.