Хүний эрхийн хуульч гэдгээрээ олонд танигдсан М.Ичинноровийг хуурамч аккаунт үүсгэсэн нэгэн иргэн янз бүрээр доромжлоод зогсоогүй төрсөн хүүхэдрүү нь хүртэл чичилсэн зүйл бичиж цахим ертөнцөд тараажээ. Тэгвэл хуульч М.Ичинноров энэ талаар эрс шүүмжилж, хариу тайлбарыг өглөө.

Тэрбээр "Хуурамч аккаунт нээгээд хөөрхөн солонгос охины зураг тавьчихаад гоё монгол нэр өөртөө өгчихөөд хүн рүү дайрч суугаа тэр хүнийг би өрөвдөж байна. Одоо байтлаа төрсөн ганц үрийг минь харааж, хэнд ч гэм хийгээгүй нялх үрийг минь хараасанд эх хүний хувьд дуугүй сууж чадсангүй. Миний хийсэн сайн үйлс гэмгүй хүмүүсийг хохироосон нүгэлтнүүдийн уурыг хүргэж байгааг ойлгож байна. Намайг яаж доромжлох чинь яах вэ. Энэ байтугайг тэсээд гараад ирдэг хүн би. Харин үр хүүхэд, нандин сайхан гэр бүлийг минь, энэ хорвоо дээр надтай учирч, үрийн минь эцэг болсон тэнгэрлэг сайхан эр хүнийг элдэв муухайгаар бичиж суух эрх танд байхгүй. Алтанхүүгийн хэрэг бидний хүссэнээр шийдэгдээгүй ч энэ хэргийг олон нийтийн өмнө ил гаргасны ачаар гэр бүлийн хүчирхийлэл, шүүх эмнэлгийн асуудал гээд олон асуудалд дэвшил авчирсан. Тиймээс би өөрийгөө энд хараалган буруутгуулахыг зөвшөөрөхгүй. Анх удаагаа өөрийгөө өмгөөлөн дуугарч байна. Хэвлэлээр ил гарахгүйгээр хичнээн олон хүнд тусалж амьдардагийг минь Бурхан мэднэ" гэжээ.