УИХ-ын гишүүн Ц.Шинэбаярыг цагдаагийн албан хаагчдын өмнөөс салаавч өгч доромжилсон гэдэг үндэслэлээр эрүүгийн хэрэг үүсгэхээр болжээ. Ийм утгатай мэдээллийг ЦЕГ-аас өчигдөр хийв. Харин Ц.Шинэбаяр гишүүн Н.Энхбаярыг баривчлахаас хэдхэн хоногийн өмнө улаан хоолойн хагалгаанд оржээ. Тиймээс чанга дуугарч болохгүй байсан учир цагдаагийнхны балмад үйлдлийг салаавч өгч эсэргүүцсэнээ найз нөхөддөө ярьсан сурагтай. Ц.Шинэбаярыг цагдаагийнхан өөрсдийгөө доромжилсон гэж үзсэн учраас эрүү үүсгэхийг хүсч байгаа бололтой. Тэгвэл УИХ-ын гишүүн Ч.Улаан, Д.Тэрбишдагва, Ц.Шинэбаяр, О.Чулуунбат нарын халдашгүй дархан эрхэнд халдсан цагдаа нартаа эрүү үүсгэх үү? Айл андуурч ороод гэрийн эзнийг дарамталсныхаа төлөө ямар хариуцлага хүлээх вэ? Монгол улсын ерөнхийлөгч байсан хүний эд хөрөнгөд халдсаныхаа төлөө бас ямар шийтгэл хүлээх вэ? гэх мэт олон асуудлыг цагдаагаас зөрүүлээд асуух ёстой гэсэн хүмүүсийн тоо нэмэгдэж байна. Үүний зэрэгцээ өөрсдийн ур чадваргүй үйлдлийнх нь төлөө салаавч өгсөн УИХ-ын гишүүнийг доромжиллоо, эрүү үүсгэх ёстой гэж гомдоллох нь шударга үйлдэл мөн үү гэх хүн ч байна. Хэрэв салаавч өгсөн Ц.Шинэбаяр гишүүнд эрүү үүсгэх ёстой юм бол ард түмний өмнөөс салаавч өгсөн Ш.Сайхансамбуу гишүүнд бас эрүү үүсгэх  нь шударга явдал мөн биз дээ гэсэн асуулт ч урган гарна.

   Ц.Шинэбаяр гишүүнийг ч уг нь өмгөөлж, хамгаалаад байх мундаг амьтан биш. Улс төрийн ямар ч гарцгүй болсон Жамухын л дүр. Гэвч УИХ-ын гишүүний иймхэн үйлдлийн эсрэг эрүү үүсгээд байвал энэ улс орон чинь юу болж хувирах вэ? Салаавч өгсөн хүн болгонд эрүү үүсгэвэл эрүүгийн хэрэгь холбогдоогүй хүн олдох уу? Үүнд цагдаагийнхан бодолтойхон хандахгүй бол бухимдсан олны уцаарыг л нэмэгдүүлнэ. Цагдаа хүн буудсан гэдэг батлагдаагүй муу нэр бий. Нэмээд цагдаа салаавч өгсөн хүн бүрт эрүү үүсгэнэ гэдэг өөр нэг муу нэртэй л болох гээд байна. Уг нь ард түмний итгэл хүндлэлийг хүлээх, ард түмнийхээ эсрэг салаавч өгч байгаа нь тухайн хувь хүний ёс зүйн л асуудал. Цагдаа бол ард түмний л нэг хэсэг. Түүнээс биш эрүү үүсгэнэ гэдэг нь арай дэндэнээ гэсэн иргэдийг санал сонсох ёстой.

   УИХ-ын гишүүний халдашгүй дархан эрхэнд халдсан гэсэн Ч.Улаан, Д.Тэрбишдагва, О.Чулуунбат, Ц.Шинэбаяр нарын гомдлыг байнгын хороо ажлын хэсэг гаргаж шалгаад дүгнэлтээ гаргатал хэлэлцэхгүй гэж хойшлуулсан. УИХ-ын гишүүний халдашгүй дархан байдал хөндөгдөж байхад шуурхайлан хэлэлцээгүй мөртлөө цагдаагийн өмнөөс салаавч өглөө гэж эрүү үүсгэнэ гэдэг бол дэндүү инээдтэй хэрэг л дээ.
Манай цагдаагийнхан эмзэг болжээ. Цагдаагийн албан хаагчийн эрх чөлөөнд халдсан гэдэг үндэслэлээр БНН-ын дарга Б.Жаргалсайханд мөн л эрүүгийн хэрэг үүсгэхээр судалж байгаа бололтой. Энэ нь бас л сүүлийн үеийн ээлжит томоохон дуулианы нэг болж хувирах нь.