ЭШЛЭЛ 1
Монгол Улсын Ерөнхийлөгч У.ХҮРЭЛСҮХ: Хоёр улсын төрийн тэргүүн нэг жилийн хугацаанд харилцан төрийн айлчлал хийж буй нь найрсаг харилцаа, хамтын ажиллагааг улам өргөжүүлэн хөгжүүлэхийн төлөөх Та бидний хүсэл эрмэлзлийн тод илэрхийлэл юм.
ЭШЛЭЛ 2
Энэхүү айлчлал нь манай хоёр улсын хооронд дипломат харилцаа тогтоосноос хойших 33 жилийн хугацаанд Узбекистан Улсын Ерөнхийлөгчийн Монгол Улсад хийж буй анхны төрийн айлчлал бөгөөд харилцаа, хамтын ажиллагааны түүхэнд нэгэн шинэ хуудсыг нээсэн, онцгой ач холбогдолтой түүхэн айлчлал болж байгааг онцлон тэмдэглэж байна.
ЭШЛЭЛ 3
Узбекистан Улс нь Төв Азийн бүс нутаг дахь манай улсын анхны “Иж бүрэн түншлэл”-ийн харилцаатай орон болж буйг онцлон тэмдэглэхэд таатай байна.
ЭШЛЭЛ 4
Айлчлалын үр дүнгээр “Монгол Улс, Бүгд Найрамдах Узбекистан Улсын хооронд Иж бүрэн түншлэлийн харилцаа тогтоох тухай хамтарсан тунхаглал” гаргаж байгаадаа баяртай байна.
ЭШЛЭЛ 5
Хоёр орны хоорондын худалдааны эргэлтийг 10-20 дахин нэмэгдүүлэх, экспорт, импортын бараа бүтээгдэхүүний нэр төрлийг олшруулах, аж ахуйн нэгж хоорондын хэлхээ холбоог өргөжүүлэхээр тохирч, “Узбекистаны худалдааны төв”-ийг Улаанбаатар хотноо нээлээ.
ЭШЛЭЛ 6
Хөдөө аж ахуйн салбарын хамтын ажиллагааг өргөжүүлэх зорилгоор 100 мянган толгой хонь, ямааг Узбекистан Улсад нийлүүлж байна.
ЭШЛЭЛ 7
Монголын агаарын тээврийн компани энэ оны хоёрдугаар хагасаас Улаанбаатар-Ташкент чиглэлд шууд нислэг үйлдэж эхлэхээр боллоо.
ЭШЛЭЛ 8
Узбекистанд дээд боловсрол эзэмшсэн олон монгол залуус найрсаг харилцаа, хамтын ажиллагааны гүүр болж ирсэн сайхан уламжлалтай. Бид “Дээд боловсролын салбарт хамтран ажиллах тухай хэлэлцээр” байгуулсан нь энэ түүхэн уламжлалыг сэргээж, оюутан залуусыг Засгийн газрын тэтгэлгээр харилцан сургахад үнэтэй хувь нэмэр оруулна гэдэгт итгэлтэй байна.
ЭШЛЭЛ 9
Монгол Улсын санаачилгаар үүсгэн байгуулагдсан “Далайд гарцгүй хөгжиж буй орнуудын олон улсын судалгааны төв байгуулах тухай олон талт хэлэлцээр”-т Узбекистан Улс нэгдэн орж буйд талархал илэрхийлье.
ЭШЛЭЛ 10
Энэ байгууллагын хүрээнд далайд гарцгүй хөгжиж буй орнуудад тулгарч буй саад, бэрхшээлийг даван туулах, хөгжлийн бодлого боловсруулах, эдгээр улс орнуудын байр суурийг нэгтгэх, харилцан туршлага солилцох хамтын үйлсэд Узбекистан Улстай хамтран ажиллахдаа баяртай байх болно.
ЭШЛЭЛ 11
Бидний яриа хэлэлцээ, харилцан тохиролцсон ажлууд хоёр орны хөгжил цэцэглэлт, ард түмний сайн сайхны төлөө биеллээ олж, хоёр улсын харилцаа, хамтын ажиллагаа улам бүр өргөжин бэхэжнэ гэдэгт итгэл дүүрэн байна.
ЭШЛЭЛ 12
Манай хоёр ард түмний найрамдал, нөхөрлөл үеийн үед батжин бэхжиж, ахан дүүсийн найрсаг харилцаа, хамтын ажиллагаа өнө мөнхөд цэцэглэн хөгжих болтугай.
ЭШЛЭЛ 13
Узбекистан Улсын Ерөнхийлөгч ШАВКАТ МИРЗИЁЕВ: Энэ бол Узбекистаны Ерөнхийлөгчийн танай улсад, мөнх хөх тэнгэрийн сайхан оронд хийж буй анхны төрийн айлчлал гэдгийг онцгойлон тэмдэглэн хэлэхийг хүсэж байна. Энэ нь найрамдал, хүндэтгэл, итгэлцэл, харилцан ашигтай байдалд суурилсан, олон талт харилцааг хөгжүүлж, бэхжүүлэхийн төлөөх хамтын хүсэл эрмэлзэл бэхжиж байгааг гэрчилж байна.
ЭШЛЭЛ 14
Улаанбаатар хот руу ойртох тусам, хот руу орж ирэхдээ улс орны хөгжлийг хараад үнэхээр их гайхсанаа хэлэлцээний үеэр би тэмдэглэсэн. Танай улсаа хөгжүүлэх “Алсын хараа-2050” урт хугацааны бодлого бодит үр дүнгээ өгч байгаа нь харагдаж байна.
ЭШЛЭЛ 15
Монгол Улсын эдийн засаг тогтмол өсөж, аж үйлдвэр, хөдөө аж ахуй, дэд бүтэц хөгжиж байгааг харж байна. Хархорум хотыг сэргээн босгох ажил эхэлсэн. Тууштай, прагматик, идэвхтэй бодлогын ачаар танай улсын олон улс дахь нэр хүнд өсөж байна.
ЭШЛЭЛ 16
Монгол Улс бол бидний уламжлалт, найдвартай түнш. Узбек, Монголын харилцаа хэзээ ч нөхцөл байдлаас шалтгаалж байгаагүй. Өнөөдөр бид “Иж бүрэн түншлэлийн харилцаа тогтоох тухай хамтарсан тунхаглал”-д гарын үсэг зурж, харилцаа, хамтын ажиллагааны шинэ үе шатыг эхлүүллээ.
ЭШЛЭЛ 17
Өнгөрсөн жил Ташкентад болсон уулзалтын дараа бүх салбарын харилцаа, хамтын ажиллагаа эрчимжсэн. Хоёрдугаар сард Засгийн газар хоорондын комиссын анхдугаар хуралдаан амжилттай болсныг би хэлэлцээний үеэр дурдлаа.
ЭШЛЭЛ 18
Өнөөдөр Эрхэм Ерөнхийлөгчтэй НҮБ, ШХАБ болон бусад олон талт бүтцийн хүрээнд нягт хамтарч, харилцан бие биеэ дэмжихээр тохиролцлоо. Хэлэлцээний үеэр эдийн засгийн хамтын ажиллагаанд голлон анхаарлаа. Ирэх жилүүдэд эрэлт хэрэгцээтэй байгаа бүтээгдэхүүний нэр төрөл, нийлүүлэлтийг нэмэгдүүлэх замаар худалдааны эргэлтийг хэд дахин өсгөх зорилт тавилаа.
ЭШЛЭЛ 19
Улаанбаатар хотноо “Узбекистаны худалдааны төв” нээсэн нь энэ ажлын суурь боллоо. Айлчлал өмнөхөн аж ахуйн нэгжүүд бизнес форум зохиож, гэрээ, хэлэлцээр байгууллаа. Аж ахуйн нэгжүүд хамтран ажиллах сонирхол улам нэмэгдэж байна. Тэдний санал, санаачилгыг бүх талаар дэмжих болно.
ЭШЛЭЛ 20
Хөнгөлөлттэй худалдаа, хөрөнгө оруулалтыг харилцан хамгаалахтай холбоотой хэлэлцээрийг аль болох богино хугацаанд байгуулахаар тохиролцлоо. Бид бие биеэ үр дүнтэй нөхөж чадах салбарууд дахь хамтын ажиллагааны чиглэлүүдээ тодорхойллоо.
ЭШЛЭЛ 21
Бид соёл, боловсролын салбарт идэвхтэй хамтран ажиллахаар тохиролцлоо. Хамтын ажиллагааны олон баримт бичигт гарын үсэг зурсныг та бүхэн харсан.
ЭШЛЭЛ 22
Энэ өдрүүдэд Улаанбаатар хотноо “Узбекистаны соёлын өдрүүд”, аялал жуулчлалын үзэсгэлэн, концерт, байгууллага хоорондын уулзалтууд болж байна. Бид тодорхой квотын хүрээнд авьяаслаг монгол залуусыг Узбекистаны тэргүүлэх их, дээд сургуульд сургаж байсан сайхан уламжлалыг сэргээхэд бэлэн байна.
ЭШЛЭЛ 23
Албан ёсны хэлэлцээ үр дүнтэй болсонд сэтгэл хангалуун байна. Гарын үсэг зурсан баримт бичиг, гаргасан шийдвэрүүдийг хэрэгжүүлэх чиглэлээр тодорхой арга хэмжээ, төслүүд бүхий Замын зураг батлахаар тохиролцлоо. Үүнд Засгийн газар, гадаад хэргийн яам хяналт тавих болно.
ЭШЛЭЛ 24
Монгол Улсад хийсэн төрийн айлчлал түүхэн айлчлал болж, бидний олон талт хамтын ажиллагааг эрчимтэй, халуун дулаан, тодорхой агуулгаар дүүрэн боллоо.
Сэтгэгдэл (7)