Ардчилсан намын дарга асан Л.Гантөмөр ярилцлагын нэвтрүүлэгт орох үеэрээ расист агуулгатай үг хэлсэн нь олны анхаарлыг татаж, шүүмжлэл дагуулаад байна. Тэрбээр "Би шинжлэх ухаан шүтдэг учраас хунчираар Монголчуудыг эдгээр эм гаргачихна гэж мөрөөддөг юм. Мөрөөдөлдөө захирагдаад хунчир тарьдаг хүмүүсийн төсөл дээр оролцсон. Хунчир тарьж л байгаа. Өөдөлдөггүй юм аа. Газар дээр юм тарихад Монгол хүн 10-20 жилийг зарцуулна. Хятад цустай улсууд бол их хурдан юм ургуулаад байдаг юм билээ. Сэлэнгэ хавиас ч юм уу. Тэднийг би муу хүн гэж хэлж байгаа юм биш шүү" хэмээн ярьсан.

Энэ нь хувь хүний байр суурь мэт боловч томоохон улс төрийн намын даргаар ажиллаж байсан, одоо УИХ-ын гишүүнээр ажиллаж буй хүний амнаас гарч буй гэдгээрээ онцгой анхаарал татаж байна. Ялангуяа Монгол хүн, Хятад цустай улсууд хэмээн угсаа гарлаар нь ялган, Сэлэнгэ аймгийн онцолсон нь расист шинжтэй, ялгаварлан гадуурхсан агуулгатай гэж үзэхэд хүргэж байна.

Ардчиллын суурь үнэт зүйл бол хүн бүр арьс өнгө, үндэс угсаанаас үл хамааран тэгш эрхтэй байх зарчим юм. Энэ нь зөвхөн үзэл санааны түвшинд бус, Монгол Улсын Үндсэн хуулиар баталгаажсан үндсэн зарчим гэдгийг иргэн бүр мэдэх биз ээ. Ийм байтал угсаатны онцлогийг чадвар, хөдөлмөр, оюун ухаантай холбон дүгнэж буй нь ардчиллын үнэт зүйлтэй зөрчилдөж байна.

Монголын хоёр том намын нэг болох Ардчилсан намын дарга асан, олон нийтэд үлгэр жишээ үзүүлэх ёстой хүнээс ийм үг гарч буй нь харамсалтай. Ардчилал бол зөвхөн сонгуулиар илэрхийлэгдэх ойлголт биш, харин үг, үйлдэл, хандлага бүрээрээ хүний эрх, тэгш байдлыг хүндэтгэх соёл юм. Үүнийг хамгийн түрүүнд улстөрчид өөрсдөө ухамсарлах ёстой баймаар...