Дэлхийн улс төр, бизнесийн нөлөө бүхий хүмүүсийг хамарсан байж болзошгүй Жеффри Эпштейний файлууд олны анхаарлын төвд ороод буй. Тухайлбал, 2025 оны сүүлээр бэлгийн хүчирхийлэгч, тэрбумтан Жеффри Эпштейнтэй холбоотой гурван сая хуудас, 2000 мянган видео бүхий файлуудыг АНУ-ын Хууль зүйн яам ил болгосон. Тухайн файлуудад Жеффри Эпштейний хийсэн гэмт хэргийн талаарх хувийн, шүүхийн болон мөрдөн байцаалтын үеийн нотлох баримтууд багтжээ. Тус баримтуудад насанд хүрээгүй хүүхдийн бэлгийн дарамт, хүний наймааны гэмт хэрэг, бэлгийн мөлжлөг зэрэг хэргийн дүрс бичлэг, зураг, материалууд ордог. Мөн тухайн хэргүүдэд оролцсон байх магадлалтай нэр нөлөө бүхий алдартнуудын нэрс уг файлд хадгалагджээ.

  Тэрхүү гурван сая хуудас бүхий Эпштейний хар дэвтэрт гуравхан сая хүн амтай манай улсын тухай 900 орчим хайлт байгаа нь сонирхолтой. Монголын эдийн засгийн нөхцөл байдал, Засгийн газрын түншлэлийн гэрээ, Ухаа худаг-Гашуун сухайт чиглэлийн төмөр замын төслийн тухай мэдээллүүд багтсан төдийгүй Монголын улстөрчийн нэр ч дурдагдсан байна.

Тодруулбал, Монгол Улсын Ерөнхийлөгч асан Ц.Элбэгдорж, Х.Баттулга нараас эхлээд хэд хэдэн хүний нэр хайлтын илэрцэд буй.

Эхнийх нь, Ерөнхийлөгч асан Ц.Элбэгдорж. Түүний Гадаад бодлогын зөвлөх байсан Л.Пүрэвсүрэн Жеффри Эпштейнтэй имэйлээр харилцсан бөгөөд тус мэйлд Ерөнхийлөгч асан Ц.Элбэгдорж Жеффри Эпштейнтэй 2013 онд АНУ-д уулзсан төдийгүй түүнийг Монгол Улсад урьсан тухай мэйлд бичигджээ. Эпштейний хар дэвтэрт нэр дурдагдсан дараагийн хүн бол Ерөнхийлөгч асан Х.Баттулгын хамаарал бүхий гэгддэг Чулуунхүүгийн Ганбат. Тэрбээр Жеффри Эпштейнээс Монгол улсад биткойныг нэвтрүүлэх талаар зөвлөгөө хүссэн имэйл бичиж,  2017 оны Монгол Улсын Ерөнхийлөгчийн сонгуулийн талаар ярилцсан аж. 2017 он гэдэг бол Ерөнхийлөгчийн сонгуулиар Х.Баттулга ялж, Ерөнхийлөгч болж байсан үе.

Энэ мэт Монголын улс төрчдийн нэр Жеффри Эпштейний файлуудад дурдагдсан нь нэр дурдагдсан хүмүүсийг буруутгах үндэслэл бус, харин ил тод байдлыг нэхэх шаардлагыг улам тодотгож байна. Цаашид Эпштейний материалууд ил болох тусам Монголтой холбоотой асуудлууд илүү тодорхой болох биз ээ. 

Жеффри Эпштейн гэж хэн бэ? 

Жеффри Эпштейн бол улстөрчид болон бизнесменүүдтэй нэлээд өргөн хүрээний холбоо хамааралтай нэгэн. Тэрбээр анх 2008 онд 14 настай охин хүчирхийлсэн хэргээр 18 жилийн хорих ял сонссон ч ялаа эдлээгүй. Түүнээс хойш 11 жилийн дараа буюу 2019 онд насанд хүрээгүй охидын биеийг үнэлүүлсэн хэргээр баривчлагдсан хэдий ч шүүх хурал болохоос өмнө нас барсан юм. Тэр цагаас өдийг хүртэл Эпштейний файлууд гэх нэрийн дор олон хүмүүсийн нэр цухуйж, олон нотлох баримтууд олны анхаарлын төвд орсоор байна. 

Д.Батчулуун