УИХ-ын чуулганаар Нийслэлийн ИТХ-ын сонгуулийн тухай хуулийг хэлэлцэх нь зүйтэй гэж гишүүдийн 85,4 хувь нь үзлээ. АН, МАН-ын бүлэг ирэх зургаадугаар сард болох УИХ-ын сонгуультай хамт нийслэлийн ИТХ-ын сонгуулийг явуулна гэж тохироод байгаа. Гэсэн ч бүлэг дотроо цөөнх болсон гишүүд үүнийг эсэргүүцсэн байр сууриа илэрхийлж байлаа. УИХ-ын гишүүн Я.Батсуурь: “16 тэрбум төгрөгөөр хэчнээн сургууль, зам, ажлын байр бий болгож болох байсан бэ? Нийслэл, аймгийн сонгууль хоёр юугаараа ялгаатай болоод салгаад байгаа нь ойлгомжгүй байна. МАН урьд нь орон нутгийн сонгуулийг УИХ-ынхтай хамт хийх нь Үндсэн хууль зөрчсөн гэж байсан. Нийслэлийнх яахаараа хууль зөрчдөггүй нь тодорхойгүй байа. Энд ерөөсөө хууль, эрх зүйн үндэслэл алга. Зүгээр л улс төрийн шалтаг гаргаад байна”.
УИХ-ын гишүүн Н.Ганбямба: “Ингэж орон нутгийн сонгуулийг наана явуулах болсон нь Үндсэн хууль дээр асуудал үүсгэнэ. Орон нутгийг нам, холимог системээс холдуулахгүй бол намын сонгууль болох гээд байна. Өөрөө удирдах ёсны байгууллагынх бол ядаж саналын хуудас тусдаа байх хэрэгтэй. Хугацаа тулсан юм их туйлширдаг шүү”.
УИХ-ын гишүүн Д.Хаянхярваа: “Энэ хуулийг их хурдан, айхтар шуурхай баталж байна. Энэ бол будлиан. УИХ-ын сонгуулийг дангаар нь явуулахад ч будилдаг. Сонгуулийг шударга явуулна гэвэл тусад нь хийх ёстой гэж боддог. УИХ бол төрийн, орон нутаг бол өөрөө удирдах ёсны сонгууль юм. Нийслэлийг тусад нь баталснаар хотод ямар ч ажил явах боломжгүй болно. Шинээр сонгогдсон дарга нь өөр хүн тавина гэж ажлын байранд бөөн маргаан болно. Нэлээн нухацтай хандаж, шийдэхгүй бол иргэдийн амьдралыг хойш татсан шийдвэр гарах гээд байна”.
УИХ-ын гишүүн Д.Очирбат: “Хүчин чадал, эрх зүйн хувьд нийслэлийн ИТХ-ыг хамтарч зохион байгуулах боломжгүй гэж байсан ч одоо нийслэлийн ИТХ-ын сонгууль ороод ирж байна. Цаанаа үлдэж байгаа Орон нутгийн сонгуулийн тухай хуулийг эрэмдэг зэрэмдэг болгоод байна. Орон нутгийн сонгуулийг одоо батлах ёстой. Яагаад гэвэл 2012 оны сонгууль болно, УИХ байгуулагдана гэсээр байтал 10 сар болж орон нутгийн сонгуулийн хугацаа болно. Тиймээс одоо давхар оруулаад хэлэлцье” гэв.
Одоо энэ асуудлыг Хууль зүйн байнгын хороогоор хэлэлцэнэ. Тэндээс гарсан санал, дүгнэлтийг үдээс хойш УИХ-ын чуулганаар дахин хэлэлцэж, санал хураах юм.
