24tsag.mn-ээс ОХУ-д хар тамхины хэрэгт холбогдоод буй гурван оюутны талаар мэдээллийг цаг алдалгүй хүргэж байгаа билээ. Тэдэнд холбогдох хэргийн шүүх хурал 2012 оны дөрөвдүгээр сарын 27-нд буюу өнөөдөр болох байсан ч тэднээс шинжилгээ авсан эмнэлгийн төлөөлөгчид ирээгүй учраас маргааш хүртэл хойшиллоо. ОХУ-ын Екатеринбург хотод суралцдаг эдгээр оюутны нэр, анги тодорлоо. Н.Нармандах, Н.Мягмаржав хоёр Уралын политехникийн дээд сургуулийн эрчим хүчний анги, Э.Хайдав барилгын ангийг энэ жил төгсөнө. Тэд Экатинбургэд 4 жил амьдарч, сурч байгаа.
Н.Нармандах, Н.Мягмаржав, Э.Хайдав нар: “бид хар тамхи хэрэглэх нь байтугай, ямар зүйл байдгийг нь ч мэдэхгүй” хэмээн мэдэгдлээ. Екатеринбургийн хотын Киров дүүргийн шүүх хар тамхи хэрэглээгүй нь тогтоогдсон хоёр дахь шинжилгээний хариуг харгалзаж үзэлгүй буруутгаж хэрэг хүлээлгэх гэж байгааг өмгөөлөгч, оюутнууд хэлж байна.
Яагаад хар тамхи татсан гэж сэжиглэх болов?
Дөрөвдүгээр сарын 11-нд монгол оюутнууд тэнхмийнхээ өдөрлөгийг тэмдэглэжээ. Үдэшлэг болж байсан байранд тэднийг оруулаагүй учраас оюутны дотуур байрны өмнө пиво ууж суусан байна. Дотуур байрны оюутнууд тэдэнд "Битгий шуугиад бай" гэсэн шаардлага тавихад биелүүлээгүй учир тэд хоорондоо зодолдсон. Зодооныг дотуур байрны хамгаалалтын албаныхан салгаж, цагдаа дууджээ. Цагдаа нар эмх замбараагүй байдлыг зогсоож, тэднийг тараасан ч монгол 5 оюутныг эмнэлгийн шинжилгээнд хамруулахаар авч явсан юм. Эхний шинжилгээгээр 3 оюутнаас нь хар тамхины төрлийн бодис илэрсэн гэж мэдээлж байгаа. Оюутнуудын хүсэлтийн дагуу дахин шинжилгээ явуулахад мансууруулах бодис илрээгүй юм. Гэсэн ч тэднийг 10 гаруй хоног албадан баривчлаад байна.
"Эхний шинжилгээний хариу буруу гарахыг үгүйсгэхгүй."Энэ хэрэгтэй холбогдуулан хэд, хэдэн гэрч мэдээлэл хийж байна.
Уралын политехникийн дээд сургуулийн хэвлэлийн албаны дарга. Дмитрий Бенеманский:
"Манай сургуулийн хамгаалалтын албаны мэдээлснээр хэрэгт холбогдоод буй 3 оюутан олон удаа хэв журмын зөрчил гаргаж байсан. Оюутны байр руу нэвтрэх үнэмлэхний зөрчилтэй. Согтууруулах ундаа хэрэглэдэг. Манай сургууль согтууруулах болон мансууруулах бодис хэрэглэхийг зөвшөөрдөггүй. Хэрэглэсэн нь тогтоогдвол сургуулиас хөөх нь зүй ёсны хэрэг. Энэ дүрэм журам аль улсын иргэн байхаас үл хамаарна."
Оюутнуудыг буруугүй гэдгийг нь нотолно гэдгээ мэдэгдсэн Свердловск мужийн парламентын орлогч дарга Георгий Перский:
"Монголоос ирсэн оюутнуудын хувьд энэ нь тун эмгэнэлтэй хэрэг юм. Би депутатын хувьд тэдэнд туслах ёстой. Сэтгэл эмзэглэж байна."
Екатеринбургийн гурван оюутныг тус хотын 14-р эмнэлэгт шинжилгээнд хамруулсан. Тус эмнэлгийн хорт бодис судлалын хүрээлэнгийн орлогч дарга Вячеслав Устюжанин: "Эхний шинжилгээний хариу буруу гарахыг үгүйсгэхгүй." гэсэн юм.
Свердловск мужийн парламентын орлогч дарга амласан ёсоороо манай улсын гурван оюутанг өмгөөлүүлэхээр өмгөөлөгч гаргаж өгсөн байна. Өмгөөлөгч: Александр Кислых:
"Хар тамхи хэрэглэсэн гэж буруутгаад буй гурван оюутныг хаана, хэзээ мансууруулах бодис хэрэглэсэн бэ? гэдгийг тодруулах оролдлого ч хийгээгүй. Оюутнуудыг баривчилсан цагдаа нар ч нилээн олон зөрчил гаргасныг бид олж тогтоосон." гэдгээ хэлж байна.
Шүүх хурал маргааш болохоор товлогдлоо. Маргаашийн шүүх хурлын шийдвэр эсрэг гарвал манай улсын гурван оюутныг сургуулиас нь хөөгөөд зогсохгүй ОХУ-аас албадан гаргах хүртэл арга хэмжээ авна. Шүүхээс ямар шийдвэр гарахыг бид эргэн сурвалжлах болно. Екатеринбург хотноо Монгол улсын Гадаад харилцааны яамны харъяа консулын газар байрладаг бөгөөд тус газрын хүсэлтээр хэргийг ийнхүү нийтэд мэдээлж байгаа юм.
